Notisia

Willemstad – Resientmente, Dr. Albert Martis, Direktor di Servisio Meteorológiko Kòrsou, den su kalidat di presidente di e Plataforma nashonal di Kambio di Klima, a hasi un bishita di kortesia na e universidat TU Delft.

Despues ku e ‘roadmap’ pa e plan stratégiko di kambio di klima di Gobièrnu di Kòrsou a wòrdu publiká, diferente gruponan a aserká e plataforma ku interes pa partisipá den e trayekto aki. Den e kuadro aki, TU Delft a aserká i a pidi pa haña mas informashon kon por kolaborá ku e plataforma pa ehekutá e diferente plannan deskribí den e ‘roadmap’. Ku apoyo di Sr. Leon Pors, a organisá un bishita na TU Delft, huntu ku Dr. Ir. Joris Timmermans di e fakultat ‘Civiele Techniek & Geowetenschappen’. E la trese dilanti ku nan ta apresiá ku e plataforma ta mustra interes pa ampli koperashon pa ehekutá sierto parti di e plannan. Mirando ku e fakultat su ekpertisio ta den opservashon ku satélite, i ta kombiná diferente informashon den un sistema komputarisá, i huntu ku ekspertisio i datonan di Servisio Meteorológiko i estadistikanan, por desaroyá konhuntamente diferente senarionan pa futuro klima di Kòrsou. Un sistema integral asina aki lo deskribí, banda di e kambio den nos klima, tambe e impakto sosio-ekonómiko pa Kòrsou. E reunion a bai den bon esfera i a palabrá den kua forma lo sigui traha, i ku e kolaborashon lo wòrdu ampliá. Esaki lo por enserá interkambio di métodonan i ku studiantenan di Kòrsou por hasi investigashon di TU Delft na Kòrsou.