Notisia

WILLEMSTAD – E di dos seshon di Simposio Karnaval Kòrsou 2024 a tuma lugá djasabra, 17 yüni último na Hotèl Renaissance, di 09:00 te ku 16:00. E evento, ku a atraé un kantidat di partisipante, tabata enfoká riba interkambio pa desaroyá i fortifiká e selebrashon di karnaval di Kòrsou.

Minister di Enseñansa, Siensia, Kultura i Deporte, (ESKD) Sr. Sithree van Heydoorn, a habri e simposio ku un diskurso tokante e meta di e aktividat akí. El a aklará ku e meta di e simposio no ta pa diktá nada, pero pa kreá un espasio di diálogo riba temanan importante rondó di karnaval di Kòrsou. Minister van Heydoorn a resaltá e importansia di un diskushon habrí riba e aspektonan ku ta afektá karnaval aktualmente, pa logra kontinuidat i sostenibilidat di e fiesta nashonal akí.

E oradó di órden, Dr. Keith Nurse, un eksperto internashonal riba e tópiko di karnaval i eventonan grandi, a presentá un diskurso inspirativo riba e potensial di kresementu i desaroyo di nos karnaval. Dr. Nurse a enfoká riba e posibilidat di karnaval di Kòrsou pa krea un impakto ekonómiko, sosial i kultural signifikante. Tambe señor Nurse a indiká ku Kòrsou no ta su so. Otro paisnan den Karibe ta konfrontá e mesun retonan. Señor Nurse a bisa: “You are not alone”. Además di Dr. Nurse, e otro oradornan tabata:

• Rudsel Regina di Kuerpo Polisial Kòrsou, ku a elaborá riba karnaval i seguridat.
• Luelo Girigorie di Ministerio di Desaroyo Ekonómiko, ku a papia tokante karnaval i nos ekonomia.
• Andre Rojer di Ofisina di Turismo, ku a papia tokante karnaval i turismo.
• Dino Daal di Universidat di Kòrsou, ku a papia tokante kon nos por mehorá e eksperensia di karnaval ku e ekonomia di eksperensia.
• Guido Rojer di Universidat di Kòrsou, ku a papia tokante di un karnaval sostenibel.

Den e di dos parti di e simposio, a hiba un seshon di diálogo tokante algun tema sentral manera ruta di karnaval, trahe, kreatividat i kantidat di partisipante pa grupo di karnaval. Esaki ku e meta pa midi e públiko presente su opinion riba e temanan spesífiko akí.

Den e di tres parti di e simposio esnan presente a haña e tarea pa den grupo na mesa indiká 3 pa 5 reto ku nan ta mira pa nos karnaval, diskutí na mesa i indiká 3 pa 5 oportunidat stratégiko pa nos karnaval i tambe indiká 3 pa 5 akshon ku ta prioridat pa atendé pa ku nos karnaval. Akinan e gruponan di un manera ku entusiasmo a traha riba e tarea akí, i a duna algun input interesante.

E simposio ta planiá pa keda un evento duradero ku ta konta ku e “input” di e diferente ‘’stakeholdernan’’ direkto i indirekto. Por sigui bisa ku karnaval tin un impakto grandi riba diferente área di maneho, manera kultura, edukashon, ekonomia, salú físiko i mental, seguridat i turismo. E meta di Minister ESKD, señor Sithree van Heydoorn, ta pa fiha un rumbo kaminda tur ‘stakeholder’ por kontribuí huntu na e desaroyo sostenibel di nos karnaval.

Manera ta konosí, aktualmente Universidat di Kòrsou (UoC) i Inter-Continental University of the Caribbean (ICUC), riba enkargo di ministerio ESKD, ta hasiendo e investigashon sientífiko kuantitativo i kualitativo riba karnaval di Kòrsou. E dos universidatnan ta aserkando diferente ‘stakeholder’ pa partisipá na e investigashon aki. Ministerio ESKD i e universidatnan kier motivá tur ‘stakeholder’ pa partisipá aktivamente na e investigashonnan akí. E puntonan ku sali for di kontakto ku tur ‘stakeholder’ di e investigashon ta keda analisá i prepará pa desaroyá maneho pa ku karnaval i pa por hasi e implementashon nan nesesario pa ku karnaval.

Mester keda enfatisá riba e importansia di kolaborashon i partisipashon di tur sektor pa fortifiká i preservá e tradishon di karnaval di Kòrsou, pero tambe pa nos bai aserká nos karnaval ku un vishon, basá riba dato i maneho dirigí riba engrandesé nos karnaval.

—

KOMUNIKASHON

*Riba e potrètnan athunto por tuma nota di e SIMPOSIO KARNAVAL KÒRSOU 2024

MAS NOTISIA

Ministerio konserní: Enseñansa, Siensia, Kultura & Deporte