Bishita na CC-CDA na Luxembourg
Publiká riba
20 Yüni 2024
Bishita na sentro di desaroyo di aprendisahe Gran Duquesa Marie Teresa na Luxembourg pa alumno spesial
WILLEMSTAD – Minister di Enseñansa, Siensia, Kultura i Deporte (ESKD) sr. Sithree van Heydoorn huntu ku su delegashon a bishitá e sentro Gran Duquesa Marie Teresa (CC-CDA) pa mucha i adolesente ku nesesidat spesial. Minister i su delegashon a keda honrá durante di e bishita ku presensia di e Prínsipe di Luxembourg su ekselensia sr. Louis X. M. Guillaume durante e bishita komo ku e prínsipe ta embahador di e organisashon CC-CDA.
Ministerio di Enseñansa, Infansia i Hubentut di Luxembourg a instituí un total di 9 sentro de kompetensia pa desaroyo di aprendisahe kaminda ta pone atenshon na e mucha ku nesesidatnan spesial, su mayornan i e dosente. Meta di e organisashon multidisiplinario aki ta pa duna guia di forma profeshonalnan ku ta enfoká riba e nesesidat spesífiko di kada mucha.
Sr. Laurent Dura (direktor di e servisio nashonal di edukashon di Inklushon), sra. Diane Marx ( direktor di CDA), i sra. Tessa Lehnert (Psikologo) i kada un a tene un presentashon i elaborá riba temanan manera e importansia di inklushon di e alumno, edukashon i formashon di e dosente i profeshonal, kuido di e alumno ku nesesidatnan spesial relashoná ku enseñansa i vários tópiko relevante mas. Tambe a splika di nan komishon nashonal pa ku inklushon i komishon nashonal pa ku alumnonan den enseñansa sekundario. Riba e websitenan aki por tuma nota di tur e informashonnan.
www.inclusion-scolaire.lu i
www.cc-cda.lu.
*riba e potrètnan athunto por tuma nota di e bishita na e sentro de kompetensia pa desaroyo di aprendisahe CC-CDA.
