Publiká riba 09 Yüli 2024
Relato di biahenan di trabou di Minister di Desaroyo Ekonómiko!
WILLEMSTAD – Den su afan pa reforsá e presensia ekonómiko di Kòrsou tantu regional komo internashonalmente, Minister di Desaroyo Ekonómiko, Ruisandro Cijntje, a ehekutá ku éksito 10 biahe di negoshi durante e promé seis lunanan di 2024. E mishonnan stratégiko akí, tur tabata dirigí riba merkadonan klave manera Merka, Brasil, Hulanda, Abu Dhabi, Antigua i Barbuda, Sürnam i Spaña.
E ophetivonan prinsipal di e mishonnan akí tabata:
E punto i logronan ekonómiko di mas importante den e promé seis lunanan di 2024 tabata:
Minister Cijntje a liderá tres mishon komersial importante, kompañá pa 45 empresario buskando oportunidatnan di negoshi riba merkadonan internashonal. Tambe, el a partisipá na diferente konferensia i a sirbi komo orador prinsipal na tres evento importante. E esfuersonan aki a enfoká riba Servisionan Finansiero, IT, Logístika, Industrianan Kreativo, Turismo, Energia i Transporte.
Na Miami, Merka, Minister Cijntje a hasi uso di e partisipashon di Kòrsou na Serie del Caribe pa fortalesé e relashonnan ekonómiko i turístiko di Kòrsou. E diskushonnan importante ku lidernan di negoshi influyente manera Stephen Beinke di Blackhawk i Luis Urrea di United Global Group a enfatisá e potensial pa invershonnan stratégiko den infrastruktura di turismo i residensial di Kòrsou.
Tambe na São Paulo, Brasil, a tuma lugá un kombersashon ku Azul Airlines ku e meta pa mehorá konektividat aéreo entre Brasil i Kòrsou, habriendo kamindanan nobo pa transporte di karga i pasahero. Ademas, a lansa un kampaña di merkadeo “high-profile” ku TV Globo pa promové Kòrsou komo un destinashon turístiko prinsipal.

Na e di 13 Konferensia Ministerial di WTO na Abu Dhabi, Minister Cijntje a avansá e aspirashon di Kòrsou pa bira miembro independiente di WTO na aña 2026 i a tene kombersashonnan produktivo ku IRENA riba desaroyo di energia renobabel.
Durante di e Sea Trade Cruise Global 2024 na Miami, Kòrsou, den kolaborashon ku Aruba i Bonaire, a promové e islanan ABC komo destinashonnan di krusero di promé nivel, antisipando un oumento di 13% den yegada di barkunan krusero den 2024.
Na Madrid, Spaña, e lansamentu di e Agensia di Desaroyo Empresarial Spaña-Curaçao a marka un kapítulo nobo den fortalesementu di e relashonnan komersial bilateral. E mishon komersial na Madrid a enfatisá e importansia stratégiko di un koperashon ekonómiko mehorá entre empresanan Spañó i empresanan na Kòrsou.
Alabes, e partisipashon na e konferensia SIDS4 na Antigua i Barbuda a suprayá e kompromiso di Kòrsou pa un desaroyo duradero i resiliente di nos islanan. Minister Cijntje a introdusí inisiativanan ku tin komo meta pa fomentá resiliensia di islanan dor di kuadronan inklusivo, sin distinshon di posishon konstitushonal, i stratégiko.
Na Paramaribo, Sürnam, durante di e ‘Suriname Energy Oil and Gas Summit – SEOG’, Kòrsou a demostrá su kapasidatnan amplio den servisionan finansiero, logístika i turismo, destakando e potensia pa integrashon ekonómiko regional i nos ekspertsio riba tereno di komersio i logístika den e sektor petrolero.
Un bishita di trabou na Atlanta i Savannah, Georgia na Merka, huntu ku e pareha real di Reino Hulandes, a enfoká riba fortalesementu di relashonnan kultural i a eksplorá oportunidatnan edukashonal i komersial. E enkuentronan a inkluí diskushon ku e institushonnan kultural i edukashonal prinsipal, reforsá e vínkulonan sosioekonómiko di Kòrsou ku Atlanta i Savannah.

Trabou Tin!
E mishonnan stratégiko di Minister Ruisandro Cijntje a elevá e profil ekonómiko di Kòrsou i a habri portanan nobo pa komersio i invershon. E posishonamentu eksitoso di Kòrsou den diferente foronan internashonal i e formashon di aliansa stratégiko ta pone énfasis riba un futuro briante ku oportunidatnan pa kresementu ekonómiko i koperashon. Pues, trabou tin!
Si bo ta deseá di lesa e relato i resultadonan kompleto di biahenan di Minister Cijntje pa e promé mitar di 2024, klek aki.

