Publiká riba 21 Ougùstùs 2024
Willemstad – Resientement na luna di ougùstùs 2024, algun empleado di e ministerio di Maneho di Gobernashon, Planifikashon i Servisio Públiko a kumpli huntu 130 aña den servisio di Gobièrnu di Kòrsou. I un kolega a baha ku penshun.
Minister Ornelio ‘Kid’ Martina a risibí 5 empleado públiko na ofisina prinsipal di e minister di BPD. Konhuntamente 4 di nan a kumpli 130 aña i unu a bai ku retiro honorífiko for di servisio di gobièrnu. Sra. Lisette de Leeuw i sr. Winston Jacob a kumpli 30 aña kada i alabes sra. Rinelma Rafael i sra. Sindra Josefina-Comenencia a kumpli 35 aña kada di servisio. Sra. Mirugia Sorel a yega e edat límite pa okupá un puesto komo ámtenar. Minister Martina a felisitá nan tur ku e logro signifikativo aki i a ekspresá su gratitut na nan tur na nòmber di nos komunidat. Empleadonan asina aki ta kontribuí grandemente na nos komunidat. Koleganan di e ministerio di BPD kompleto ta felisitá sra. de Leeuw, sra. Rafael, sra. Josefina-Comenencia, sr. Jacob ku e fecha memorabel aki i sra. Sorel un kaluroso pabien ku un penshun bon meresí.
Drpd. : sra. de Leeuw, sra. Raphael, sr. Jacob, Minister Martina, sra. Josefina-Comenencia, Sra. Sorel.
