Notisia

Progreso den e proseso pa yega na restourashon di

kondishonnan di trabou pa ámtenar i ekivalente nan

WILLEMSTAD – Awe a dal un paso importante pa restorá e kondishonnan di trabou di ámtenar i ekivalente nan. Dia 1 di yanüari 2021, e ordenansa nashonal relashoná ku redukshon di kondishonnan di trabou a drenta na vigor, komo un medida den kuadro di e sosten finansiero di Hulanda pa ku e e krísis di COVID-19. Durante e periodo aki, gobernante, ámtenar i ekivalente nan a hasi sakrifisio pa demostrá solidaridat, apesar di e retonan grandi ku nos tur tabatin den e periodo di COVID.

Dor di revoká artíkulo 9 di e ordenansa nashonal menshoná, gobièrnu ta pone un fin na e restrikshonnan finansiero ku ta apliká for di 2021 i ta restorá bek e kondishonnan laboral. Gobiernu ta paga indeksashon ku fecha di entrada 1 di yanüari 2024, na balor di 17.1 mion florin na desèmber 2024.

Na yanüari 2025, Gobièrnu lo paga un suma di 18.7 mion florin na “loontrede” i “lumpsum”, i 17 mion florin pa indeksashon. Empleadonan di direktiva di skolnan supsidiá lo risibí un pago di 6.2 mion florin na “loonrede” i “lumpsum”. Ehekushon di e pagonan aki tabata dependé di e proseso pa yega na un akuerdo final den e plataforma di “Centraal Georganiseerd Overleg in Ambtenarenzaken” (CGOA).

Awe a firma e konvenio entre partidonan despues di negosiashonnan ku a kuminsá den luna di sèptèmber. E akuerdo aki a keda firmá na nòmber di gobièrnu dor di e minister di BPD a.i., Sr. Sithree van Heydoorn, e sindikatonan representá den Komishon Sentral di Sindikatonan (C.C.v.V.) i e presidente di CGOA. Awor ku a yega na un akuerdo, por inisiá ku e proseso legislativo pa asina Parlamento por trata esaki i duna su aprobashon pa asina gobiernu por kumpli ku pagonan den aña 2024.

Ku e paso aki, gobièrnu ta mustra su kompromiso pa restourá kondishonnan laboral. Minister van Heydoorn remplasando minister Hato, ta sigui hasi esfuerso pa hiba e proseso aki na un konklushon eksitoso na bienestar di ámtenar i ekivalente nan.

—

KOMUNIKASHON

MAS NOTISIA

Gobièrnu di Kòrsou