Publiká riba 28 Òktober 2024
WILLESTAD – Den kuadro di e programa Mehorashon di Enseñansa (MdE) tin diferente proyekto ku mester tuma lugá. Minister enkargá ku enseñansa sr. Sithree van Heydoorn a presentá e programa di MdE i a duna splikashon amplio riba e programa . Awor ta bai akshoná un parti kaminda ta krea oportunidat pa mas profeshonalisashon i desaroyo di nos alumnonan den eksterior.
Pa realisá e trayekto aki ministerio di Enseñansa, Siensia, Kultura i Deporte (ESKD) a firma akuerdo ku sra. Irene Dick pa e karga e proyekto ku ta bai kuminsá huntu ku “Servisio Nacional de Aprendizaje” (S.E.N.A.) na Colombia. Den e proyekto aki Ministerio di ESKD ta bai traha huntu ku S.E.N.A. i tin komo meta, pa formashon profeshonal di nos hóbennan dor di sigui kursonan spesialisá na Colombia. Sra. Irene Dick ta esun responsabel pa karga e trayekto aki pa ministerio di ESKD.
E trayekto aki ta speshal pa alumnonan ku tin algun eksperensia kaba den trabou. E alumnonan ta haña oportunidat pa profeshonalisá nan mes den nan área di trabou dor di sigui kurso na S.E.N.A. E kurso nan tin un durashon di 6 luna i ta bai keda finansiá pa Gobièrnu di Kòrsou den kordinashon ku Stichting Studiefinanciering Curaçao (SSC). Den transkurso di e aña aki ta bai saka mas informashon di e trayekto aki komo ku awor sra. Dick huntu ku Minister i Ministerio di ESKD ta bai kaba di formalisá e plan di ehekushon.
Minister di ESKD sr. Sithree van Heydoorn ta sigui traha pa ehekutá e programa MdE i ta krea oportunidat pa nos alumnonan por desaroyá di forma profeshonal pa asina duna un mihó servisio den nos komunidat.
—
KOMUNIKASHON
** riba e potrèt athunto por tuma nota di e momentu ku a firma e akuerdo.
