Publiká riba 14 Novèmber 2024
WILLEMSTAD – Ku yen di espektativa Ministerio di Desaroyo Ekonómiko ta anunsiá ku e ta presentá ‘Upskill Curaçao’ dia 16 di novèmber próksimo, di 9:30’or di mainta pa 12’or di mèrdia, na World Trade Center Kòrsou (den e salanan ariba) durante e Job Fair di SCFC. E evento akí ta enfoká riba fortalesimentu di e kapasidatnan di nos trahadónan lokal.
‘Upskill Curaçao’ ta kreá spesialmente pa duna e profeshonalnan lokal ku ta trahando den e époka akí informashon vital tokante e tipo di empleonan ku e sektornan ekonómiko kresiente di Kòrsou ta ofresé. E evento lo presentá e abilidatnan nesesario pa ekselá den e merkado laboral ku ta kambia konstantemente. Ademas, lo informá e partisipantenan tokante e diferente kursonan lokal i online ku nan por partisipá na dje pa sigui krese. E reklutadónan ku lo tei presente tambe lo brinda konsehonan pa yuda e partisipantenan avansá den nan karera.
Ministerio di Desaroyo Ekonómiko ta invitá tur empleado lokal pa probechá di e oportunidat akí. Registrá i partisipá na e evento akí i kombertí bo mes den un di e lidernan ku ta kontribuí na e trayekto pa un Kòrsou mas fuerte i sostenibel.
Scan e QR-code ku ta kompañá e komunikado akí pa yena bo registrashon. Den kaso ku tin pregunta, por tuma kontakto libremente na E63digital@gmail.com.
