Publiká riba 24 Novèmber 2024
WILLEMSTAD – Pomé Minister Gilmar Pisas ta aktualmente na Sürnam pa un bishita ofishal den kuadro di e selebrashon di 49 aña di Independensia Estatal di Sürnam. Aparte di e aktividatnan festivo, Promé Minister Pisas tin un programa ku ta inkluí diferente reunionnan stratégiko i tambe bishitanan di trabou pa enforsá e kolaborashon bilateral entre Kòrsou i Sürnam.
Un delegashon di invershonistanan di Kòrsou ku a biaha huntu ku e Promé Minister, lo presentá solushonnan di energia inovativo na partnernan di Sürnam. Alabes tin un bishita planiá pa e área rural, kaminda e enfoke lo ta riba eksplorá posibilidatnan den sektor di agrikultura i turismo.
Promé Minister tambe lo tene un enkuentro ku Presidente Chandrikapersad Santokhi den Palasio Presidensial, kaminda den un ambiente konstruktivo nan lo diskutí ambishonnan komun i oportunidatnan nobo di koperashon. Minister Albert Ramdin di Asuntunan Eksterior, Komèrsio Internashonal i Kolaborashonnan Internashonal (BIBIS) tambe lo ta presente durante di e enkuentro akí, i lo pone énfasis riba e importansia stratégiko di un kolaborashon mas intensivo entre e dos paisnan.
E diálogonan ta konsentrá, entre otro, riba fortalesé e koperashon ekonómiko. Kòrsou tin un demanda na kresementu pa produktonan di agrikultura fresku, manera bèrdura i fruta, i tambe produktonan trahá di palu, inkluso porta i bentana. Sürnam tin tremendo kapasidat pa kubri e nesesidatnan akí.
Promé Minister Pisas ta indiká ku e kolaborashon akí ta bai mas leu ku solamente benefisionan ekonómiko. “Importá produktonan di Sürnam no solamente ta duna un impulso na nos sektor di turismo, pero tambe ta kontribuí na un kresementu ekonómiko sostenibel pa e dos paisnan. Esaki ta un kolaborashon ku ta trese resultado tangibel pa nos komunidatnan,” segun Promé Minister Pisas.
Tambe e konekshonnan históriko i kultural entre Kòrsou i Sürnam ta haña atenshon durante e bishita akí. “Nos relashon ta basá riba un historia komun. Fortalesé e lasonan akí ta pone e fundeshi pa un futuro yen di oportunidatnan nobo pa nos hendenan,” segun Promé Minister Pisas.
Minister Ramdin ta indentifiká posibilidatnan spesialmente den e área di energia i turismo. “Ku e rikesa natural di Sürnam i su atrakshon ekoturístiko úniko, i ku e eksperensia di Kòrsou den e sektor di hospitalidat, nos por promové e región komo un destinashon multifasétiko i atrakshon internashonal,” segun Minister Ramdin.
E bishita di Promé Minister ta marka un paso importante pa e relashon entre Kòrsou i Sürnam, ku enfoke riba un desaroyo sostenibel i un mehorashon den e nivel di bida pa ámbos pais.
Fuente di pòrtrèt: Gabinete di Presidente di Sürnam
