Notisia

Willemstad – Tur partido polítiko por kuminsá ku nan propaganda polítiko, dos (2) luna promé ku e fecha di elekshon, ku ta konta for di dia di entrega di lista. ROP ta duna splikashon di tur e regla i rekisitonan ku mester tene kuenta kuné pa un propaganda polítiko.

Resientemente ”konseho elektorado’ a anunsiá ku fecha di e próksimo elekshon pa aña 2025 ta 21 di mart. Konsekutivamente, e fecha pa kuminsá ku kualke propaganda polítiko segun e stipulashon di e maneho di propaganda ta 21 di yanüari 2025.

E propaganda no tin mag di:

• Kousa daño físiko na kaya òf ophetonan den área públiko,
• Forma un estorbo pa uso efisiente di área públiko,
• Opstakulisá e aksesibilidat di e área públiko,
• Forma un opstákulo pa seguridat den tráfiko,
• Stroba e mantenshon di e área públiko,
• Forma molèster òf sushedat,
• Hasi daño na e bista di e área públiko .

Otro eksigensia ku mester kumpli den kuadro di òrdu públiko ta:

• Propaganda iluminá, propaganda riba dak, òf propaganda vertikal riba mas ku un piso, ta pèrmití solamente den áreanan di negoshi i áreanan di tienda, ku eksepshon di nos sentro di siudat,
• Propaganda ku ta move òf kambia, propaganda ku lus, inkluyendo ‘billboards’ digital, por kousa peliger pa tráfiko. P’esei promé ku pone nan, mester konsultá ku ROP tokante e sitio, e intensidat di lus, e frekuensia di kambio i moveshon, i e manera ku ta posishoná na lado di kaya. Asina ROP por evaluá si e manera proponé ta pèrmisibel.
• No ta pèrmití pa e propaganda stroba bista di usuarionan di tráfiko di ningun forma. Esaki ta konta prinsipalmente pa krusadanan. No ta permití pa propaganda ser pone di tal manera ku e ta trese peliger den tráfiko. No ta permití pa pone propaganda riba rotònde.
• No ta pèrmití pa pone propaganda na mobilario públiko, bòrchinan di kaya i di tráfiko, solamente na palu di lus, no na mata den área públiko, i e mester wòrdu pega di tal manera ku e por wòrdu kita fásilmente despues.
• No ta pèrmití pa pone “driehoeksborden” òf “sandwichborden”,
• No ta pèrmití pa pone propaganda ku zonido,
• Propaganda den forma ta permití solamente den área di negoshi òf área di tienda, ku eksepshon di nos sentro di siudat,
• No ta pèrmití propaganda ku no ta di material sólido i duradero,
• No ta pèrmití parker vehíkulo, trailer i/òf otro ophetonan mobil, ku propaganda riba dje,
• riba òf banda di kayanan públiko. Esaki ta pèrmití solamente riba tereno di parker.

ROP ta traha duru pa ordená i manehá e parti di propaganda polítiko. Di e forma aki, nos komunidat por simpatisá ku nan eskoho personal na un manera bon struktura. ROP ta boga tur Partido Polítiko pa mantené nan mes na tur regla i eksigensia eksistente.

Pa mas informashon tokante eksigensia di tipo di propaganda polítiko, ta inkluí e foyeto ku ta duna mas informashon. Esaki ta aksesibel tambe via nos websait www.vvrp.cw .

MAS NOTISIA

Ministerio konserní: Tráfiko, Transporte i Planifikashon Urbano