Notisia

WILLEMSTAD – Miéntras e fechanan ta aserká pa e marchanan di Karnaval 2025, Ministerio di Desaroyo Ekonómiko kier rekordá tur interesado ku tin intenshon pa bende produkto riba rutanan di karnaval (Bándariba i/òf Bándabou) ku nan mester disponé di un pèrmit temporal báildo pa por hasi esaki. E último fecha pa hasi petishon pa un pèrmit temporal pa ‘ventvergunning’ òf ‘standplaatsvergunning’ ta 31 di yanüari 2025.

Aplikantenan ku ta kumpli ku tur e rekisitonan preskribí i ku ta deseá pa bende algu riba ruta di forma ambulante durante karnaval ya por apliká pa un ‘ventvergunning’ temporal (pèrmit pa benta ambulante). Personanan ku ta deseá pa bende produkto for di un kantina mobil por hasi petishon pa un ‘standplaatsvergunning’ temporal (pèrmit pa benta for di un kantina mobil). Esnan ku tin pèrmit pa un puesto fiho riba e ruta tambe mester apliká pa un pèrmit spesífiko pa Karnaval 2025.

Tuma bon nota! Interesadonan ku ta deseá pa bende kos tantu riba e ruta di karnaval di Bándariba i Bándabou mester hasi petishon pa kada un di e rutanan aki separá. Bendedónan ku tabata bende kos kaba riba ruta di karnaval den añanan anterior tambe mester apliká pa un pèrmit spesífiko pa Karnaval 2025.

Pa entregá un petishon sea pa un vent- òf un standplaatsvergunning mester tin e siguiente dokumentonan na òrdu:

• Un karta di apoderado i identifikashon bálido di apoderado (den kaso esaki ta aplikabel);
• Identifikashon bálido di esun ku ta hasi petishon i di kada asistente ku lo laborá huntu kuné;
• Si e persona ku ta hasi e petishon i/òf un di su asistentenan ta estranhero, mester presentá tambe kopia di un pèrmit di estadia òf kopia di e pèrmit kaduká huntu ku e komprobante di e petishon pa prolongashon (copy client);
• Huntu ku esakinan mester trese tambe un sertifikado di salú di e bendedó, (tur asistente tambe mester tin nan karchi di kùr di G&Gz (ántes GGD) durante e evento)
• Komprobante di pago di prekario (solamente pa un pèrmit temporal di standplaats),
• Kopia di reibeweis, karchi di kùr, resibu di seguro i papel di number di outo (solamente pa un pèrmit temporal di vent).
• Un deskripshon kla di e sitio kaminda lo bende kos;
• Un deskripshon kòrtiku di e sitio i medio di benta;
• Deskripshon kla di e produkto(nan) ku lo bende inkluyendo potrèt/pintura di e produkto(nan)
• Komprobante di pago di ‘legekosten’

Na momentu di entrega di e pèrmit ta pidi tambe un stampia na balor di 20,- florin pa e ventvergunning i 20,- florin pa e standplaatsvergunning.

Pa por hasi petishon pa ámbos pèrmit (vent- òf standplaatsvergunning temporal) pa temporada di Karnaval 2025 mester akudí durante oranan di ofisina na Lokèt di Pèrmit, departamentu Intake, na Saliña 127 pegá ku Subway te ku djabièrnè 31 di yanüari 2025.

Ta urgi tur petishonario pa na momento ku nan risibí notifikashon/yamada ku e desishon ta kla pa pasa buska esaki na tempu.

Pa mas informashon, por fabor bishitá: https://loketdigital.gobiernu.cw òf tuma kontakto libremente na telefòn (5999) 433-3123 òf WhatsApp (5999) 433-3127.

MAS NOTISIA

Ministerio konserní: Desaroyo Ekonómiko