Publiká riba 17 Mart 2025
Willemstad – Ministerio di Gobernashon, Planifikashon i Servisio Públiko di Kòrsou (BPD) a implementá e plataforma di Microsoft 365 (M365) pa henter gobièrnu kuminsando riba djárason, dia 12 di mart 2025. Empleadonan públiko ta kuminsá haña akseso na e plataforma aki pa asina funshoná i traha na un manera mas efisiente i moderno.
Mundu kompleto ta modernisá, digitalisá i outomatisá pa keda aktualisá entre otro nan atministrashon pa traha mas efektivo. P’esei gobièrnu di Kòrsou no por pèrmití su mes e luho di keda sin digitalisá i outomatisá. E faktor mas importante den funshonamentu di gobièrnu ta su servisio na su komunidat. Pa e motibu aki gobièrnu di Kòrsou a skohe netamente e plataforma M365 ku ta brinda posiblidatnan ku ta yuda e aparto gubernamental en grande ku su tareanan. E pakete digital nobo ta pa yuda alsa seguridat, aksesibilidat i mihó kolaborashon entre empleadonan.
E promé ámtenarnan a start ku entrenamentu kaba ku e programanan di M365 pa dominá tur e funshonalidatnan ku e programa ta brinda. Konsekuentemente e servisio ku gobièrnu di Kòrsou ta duna na su pueblo sin duda lo sigui subi na un nivel aun mas satisfaktorio.
