Willemstad, 17 di mart 2025 – Den oranan di djaluna atardi, Minister di Hustisia, mr. Shalten Hato tabata kontentu pa otro logro mas pa Kuerpo Polisial Kòrsou. E okashon aki, tabata momentu ku Minister por a duna e tim di polis riba baiskel, un total di 12 baiskel nobo ku a yega for di eksterior, spesial pa reforsá e tim i duna ekipo nobo na e personal. Pa algun tempu kaba, e personal di e tim aki a bati na porta di mando di Kuerpo Polisial Kòrsou i tambe Minister di Hustisia pa indiká ku nan tin mester di mas material pa por patruya den nos sentro di siudat.
E introdukshon di e baiskelnan nobo ta parti di un esfuerso kontinuo ku Ministerio di Hustisia ta hasi pa reforsá seguridat públiko i intensifiká kontrol na área di Willemstad. Segun e hefe di Kuerpo Polisial Kòrsou, sr. Raymond Ellis, “e Bike Team ta demostrá hopi efekto den su presensia riba kaya i ta permití un reakshon mas rápido na situashonnan di emergensia.”.
Benefisio pa Seguridat i Komunidat
E uso di baiskel pa patruyá ta ofresé hopi benefisio. E polisnan ta mas fleksibel pa mov’é den e área di siudat, spesialmente den lugá kaminda tráfiko di vehíkulo ta limitá. Ademas, nan por yega na lugánan mas difísil ku vehíkulo grandi i logra interaktuá di manera mas serka ku komunidat.
Ademas di e benefisionan operashonal, e baiskel ta kontribuí na un medio ambiente mas limpi, redusí gastunan riba kombustibel i intensifiká e relashon entre polis i siudadano.
Un Esfuerso pa Konfrontá Kriminalidat
Segun KPK, e baiskel nobo lo yuda den e bataya kontra kriminalidat, maske mas den kaso di pikiaterian i otro delitonan chikí. Presensia di polis den siudat por haña un efekto preventivo i fortifiká un ambiente mas seguro pa tur hende. E Bike Team di polis lo sigui operá den tur área di Willemstad, inkluyendo Otrobanda, Punda, Pietermaai, Skarlo i tambe Bapor Kibra. Kuerpo Polisial Kòrsou ta pidi komunidat pa duna nan e sosten di semper i si tin algu sospechoso, pa komuniká ku polis via 917.
