Notisia

Ku un pènel habrí pa públiko tokante Kapasidat di Destinashon Turístiko den Karibe

Willemstad, 16 di Yüni 2025 – E di dies Konferensia Internashonal riba Estudio di Turismo i Rekreo (International Conference on Tourism and Leisure Studies) lo tuma lugá entre 18 i 20 di yüni 2025 na Universidat di Kòrsou (UoC). Durante tres dia di evento, delegadonan (akadémiko) internashonal lo diskutí ideanan inovativo i desaroyonan resien den turismo i rekreo global.

E tema prinsipal di e konferensia ta: “Hospitalidat Karibense: Lès Global for di Eksperensianan Lokal.” Un di e subtemanan importante ta:
“Turismo, Rekreo i Aksesibilidat: Prinsipionan pa Inklushon i Interkonektividat.”

E konferensia ta duna eksperto akadémiko, profesor, investigador, profeshonal di industria i grupo di interes, un plataforma pa eksplorá e desafionan fundamental ku ta afektá e sektor di hospitalidat den region, pa diskutí agèndanan di investigashon aktual i pa saka lèsnan útil pa e industria turístiko global.

Delegadonan for di 11 pais lo ta presente: Merka, Hulanda, Reino Uní (Inglatera), Alemania, Kánada, Barbados, Kroasia, Colombia, Hapon, Siprus i Kòrsou mes.

E konferensia ta wòrdu organisá pa Common Ground Research Networks, ku a funda e “Tourism & Leisure Studies Research Network” na 2015 ku e meta pa eksplorá e aspekto ekonómiko, kultural i organisatorio di turismo i rekreo. E edishon di 2025 ta tuma lugá den kolaborashon ku Universidat di Kòrsou (UoC), Ministerio di Desaroyo Ekonómiko (MEO) i Ofisina di Turismo di Kòrsou (CTB).

Un pènel spesial tokante e Kapasidat di Destinashon Turístiko (Tourism Carrying Capacity) lo presentá estudionan di kasonan for di diferente parti di region, ku ta ofresé komprondementu práktiko kon pa manehá e kresementu di turismo na un manera sostenibel i responsabel.
E término “kapasidat di destinashon turístiko” ta referí na e kantidat máksimo di hende òf aktividat ku un ambiente por sostené sin kousa impakto negativo (ambiental, sosial òf ekonómiko).

E pènel ta konsistí di e siguiente ekspertonan:

• Amy Victorina, arkeólogo di National Archaeological Anthropological Memory Management (NAAM)
• Dino Daal, Associate Program Director, International Hospitality and Tourism Management Program, Faculty of Social Sciences and Economics (UoC)
• Muryad de Bruin, Managing Director di Curaçao Tourist Board (CTB)
• Seleni Matus, Adjunct Professor na George Washington University i Direktor di International Institute of Tourism Studies, ku ta enkargá aktualmente ku e estudio di e kapasidat di Kòrsou komo destinashon turístiko.

E konferensia lo wòrdu komplementá ku bishitanan na lugánan turístiko lokal, kaminda partisipantenan lo por eksperensiá ku nan mes wowo kon Kòrsou ta buska un balansa entre turismo i desaroyo sostenibel.

Un invitashon habrí ta bai pa pueblo di Kòrsou pa sigui e diskushon tokante kapasidat di destinashon turístiko online via e website di Universidat di Kòrsou (UoC), riba 19 di yüni, entre 9:00 i 11:00 di mainta.

Nos ta spera un diálogo riku, ku konekshon signifikativo i kompartimentu di konosementu, ku lo duna forma na e futuro di turismo na Kòrsou, den Karibe i mas aya.

MAS NOTISIA

Ministerio konserní: Desaroyo Ekonómiko