Publiká riba 01 Yüli 2025
TRASPASO DI E FASILIDATNAN NA EMMASTAD PA VIGOR MIDSTREAM I VIGOR TA RISIBÍ KONSEPTO DI E AKUERDO KU GOBIÈRNU
WILLEMSTAD – Promé Minister Pisas ta anunsiá ku desde promé di yüli 2025, e fasilidatnan di refineria na Emmastad ta keda ofisialmente traspasá di 2BAYS Curaçao N.V. (despues: 2BAYS) pa Vigor Midstream Inc. (despues: Vigor). Esaki ta kompletamente konforme planifikashon i un paso importante den implementashon di e Akuerdo di Hür ku a keda será, eksaktamente un aña pasá dia 1 di yüli 2024 entre 2BAYS i Vigor, pa maneho di e instalashonnan di refineria na Bullenbaai i Emmastad. E fasilidatnan na Bullenbaai ya a wòrdu traspasá fo’i dia 1 di desèmber 2024 ku éksito pa Vigor. E implementashon di e Akuerdo di Hür ta kasi kompletamente riba skema despues di e traspaso pa Vigor di e fasilidatnan na Emmastad. Na mes momento ku e traspaso di e fasilidatnan di Emmastad tuma lugá, e estudio ambiental di tres aña (“Environmental Baseline Study”) tambe lo kuminsá kana.
Apesar di e preokupashonnan ekspresá den medionan di komunikashon dor di sierto partidonan, inkluyendo un supuesto paro den ehekushon di e Akuerdo di Hür entre 2BAYS i Vigor, gobièrnu ta konfirmá lo kontrario. A base di investigashonnan finansiero realisá pa 2BAYS por konkluí ku Vigor ta kompletamente bei ku tur pago di hür na 2BAYS, ku Vigor tin sufisiente kapasidat finansiero (“prueba di fondo”) pa ehekushon di e aktividatnan na Kòrsou, ku Vigor tin sufisiente posibilidat den su ret global pa optené krudo i/òf derivadonan di esaki pa su aktividatnan na Kòrsou (“prueba di materia prima”) i ku Vigor ta kumpli ku e kondishonnan finansiero i otro kondishonnan stipulá dor di 2BAYS (den kuadro di e Akuerdo di Hür firmá 1 di yüli 2024) i gobièrnu (en bista di e Akuerdo ku Gobièrnu ku ta den fase final).
Ademas, den términonan operashonal, e promé deskarga na Bullenbaai a tuma lugá kaba, mientras ku e demanda pa kapasidat di almasenamentu (na Bullenbaai) a oumentá pa motibu di desaroyonan den merkado mundial. Tambe Vigor a terminá e estudionan tékniko di e fasilidatnan na Emmastad, ku a indiká ku di 100 tanki ku a hasi inspekshon, un kantidat di 40 tanki ta kla pa uso mesora i por hasi alrededor di 60 otro tanki adekuá pa uso ku ahustenan mínimo. Ademas di esakinan, Vigor a kuminsá entrená e personal tékniko, prinsipalmente trahadónan lokal i nan a inisiá e proseduranan pa un destaho públiko pa e trabounan ku mester wòrdu realisá dor di kontratistanan lokal den e promé fase i durante implementashon di e estudio ambiental di tres aña. Konsiderando tur esaki, 2BAYS a konfirmá na gobièrnu ku Vigor ta aktuando di forma profeshonal, konfiabel i ambisioso durante e fase akí di implementashon di e Akuerdo di Hür.
Segun Promé Minister Pisas un ke otro ta un indikashon fuerte ku tur partido, esta 2BAYS, Vigor i gobièrnu mes, ta trahando ku hopi dedikashon riba un desaroyo industrial duradero, kreando perspektiva, kuponan di trabou i rekuperashon ekonómiko den e sektor importante akí di nos ekonomia. Promé Minister Pisas ta deklará mas aleu ku: “último lunanan e partidonan a traha intensivamente huntu pa establesé un fundeshi sólido pa un operashon sostenibel di e fasilidatnan di e refineria na Bullenbaai i Emmastad. Ku finalisashon eksitoso di e aktividatnan den e promé fase di implementashon akí, ta bisto ku Vigor ta kla pa kuminsá traha komo un partner konfiabel na Kòrsou”.
Komo resultado di e desaroyonan akí i e informenan di 2BAYS, Promé Minister Pisas awe a presentá na e doño di Vigor un konsepto di e Akuerdo entre Gobièrnu i Vigor (“Government Agreement”). E akuerdo akí ta regla, pa e durashon di e Akuerdo di Hür, e derechonan (inkluso fasilidatnan fiskal) i obligashonnan di Vigor i e divishon di responsabilidat entre Pais Kòrsou, Vigor i e kompanianan di gobièrnu ku ta aktivo riba e terenonan di e refineria na Emmastad i Bullenbaai. Un di e obligashonnan mas importante di Vigor ta implementashon di e eksigensianan ambiental basá riba e Ordenansa Nashonal pa Eksigensianan na Kalidat di Aire ku ta vigente fo’i 1 di yanüari 2025. Di akuerdo ku e legislashon ambiental nobo akí, límitenan internashonalmente aseptá (i mas estrikto) ta wòrdu fihá pa konsentrashonnan permisibel di “fijnstof” i “stikstofdioxide” (NO2) den aire liber, ku e meta pa mehorá kalidat di aire i protehá e salú di nos poblashon.
Den e periodo ku ta bini Vigor lo drenta den diálogo ku e instansianan gubernamental konserní i tambe e kompanianan di gobièrnu ku ta aktivo riba e terenonan di refineria na Emmastad i Bullenbaai, pa asina finalisá e Akuerdo ku Gobièrnu.
