Publiká riba 03 Yüli 2025
WILLEMSTAD – Djabièrnè 27 di yüni 2025 último, Ministerio di Desaroyo Ekonómiko (MEO), den kolaborashon ku Mi NEGOSHI Shared & Support Services, ADECK i Kámara di Komèrsio di Kòrsou, a organisá un selebrashon ku ta komplementá pa inspirá i fortifiká nos komunidat empresarial.
E aktvidat su tema tabata “Impulsando Kresementu i Desaroyo”. E aktividat a konsentrá den e hanchi empresarial ku ta e kaya di Junior Salas den Punda. Tabatin oportunidat pa empresarionan por a haña informashon na e Marshe Informativo parti pafó serka diferente stakeholder i parti paden di e sala di Mi NEGOSHI Shared & Support Services tabatin diferente tópikonan interesante pa e empresario ku ta òf ku ke hasi negoshi. E presentashonnan tabata asina interesante i asina bon bishitá ku e espasio den e sala di Mi NEGOSHI Shared & Support Services tabata chikitu pa por a akapará e kantidat di bishitante.
Na final di e atardi, tabatin un happy hour empresarial, unda tur esnan presente por a konektá i kompartí ku otro. Sr. Roderick Middelhof, Minister di Desaroyo Ekonómiko, a duna un spich, felisitando tur empresario mikro, chiki i mediano, i Minister Middelhof a ilustrá tambe e importansia di e Empresanan aki, ku ta e wesu di lomba di e ekonomia di Kòrsou.
Despues di e spich di Minister Middelhof, algun empresario presente por a gana diferente premio ku a wòrdu rifá, kual a hasi ku e selebrashon muchu mas atraktivo.
Ministerio di Desaroyo Ekonómiko, Mi NEGOSHI Shared Support Services, ADECk i Kámara di Komèrsio kier a gradisí tur stakeholder i tambe tur e empresarionan ku a partisipá pa e realisashon di e evento tabata un éksito.
Mirando bèk riba un atardi di selebrashon i informashon eksitoso, Ministerio di Desaroyo Ekonómiko i Mi NEGOSHI Shared & Support Services ta konvensí, ku mester sigui kontribuí ku tipo di sekshonnan informativo asina’ki pa nos empresarionan ta muchu mas ekipá ku e informashonnan nesesario pa nan negoshi.
