Nieuws

Willemstad – Lokèt di Pèrmit a krea espasio èkstra pa mayornan por hasi petishon pa Transporte Eskolar.  E fechanan èkstra ta e 4 djasabranan benidero. Esaki pa tur esnan ku ta bini na remarke pa transporte eskolar.

Lokèt di Pèrmit a kuminsá tuma petishon for di djaweps 3 di yüli 2025  pa Transporte Eskolar 2025-2026. Pa entregá petishon por hasi esaki tantu Online na:  https://loketdigital.gobiernu.cw/onderwijs/schooltransport , komo personal na Lokèt di Pèrmit.  E fechanan adishonal ta:
– Djasabra 26 di yüli, siguí pa e djasabranan 9, 16 i 23 di ougùstùs 2025.  Por pasa personal hasi petishon entre 9 or di mainta pa 3 or di atardi.

E dokumentonan ku ta nesesario pa e petishon ta lo siguiente;

• Karta di skol ku e yu ta inskribí pa aña di skol 2025-2026 ku stèmpel i firma di skol.
• Identifikashon válido (Sédula, Reibeweis òf Paspoort) di e mayor(nan) òf di e tutor ku ta hasi e petishon.
• Sédula di e yu òf si e yu no tin Sédula, su karchi di SVB.
• Prueba di entrada di Mama i Tata, si nan ta kasá of bibá, den kaso di e Tutor meskos.
  – Si mayornan ta traha, mester trese slep di salario di último luna.
  – Si un di e mayornan no tin entrada òf no ta traha, mester tuma un deklarashon di Inspekshon di Belasting (Por pidi esaki tambe via di mail: inkomensverklaring@gobiernu.cw)
  – Si un di e mayornan a pèrdè trabou, mester bini ku karta di retiro i último slep di salario.
  – Si mayor ta kobra ònderstant, mester bini ku karchi di MCB (SOAW).
  • Buki di Famia òf Trouwboek òf Akta di nasementu òf Uittreksel di Kranshi (Esaki mester ta klaramente visibel).
  • Voogd/Tutor mester trese e desishon (Beschikking) di Korte.

Den kaso e yu ta interná na un instituto:

Mester trese e karta ku e yu ta den e instituto. Identifikashon di e persona ku ta hasi e petishon i mester demostrá ku e ta traha na e instituto.

Ta importante pa e persona ku hasi petishon duna su emailadrès i un number di telefòn ku asina nos por komuniká kuné.

Tuma bon nota di e fechanan ariba menshoná i perkurá pa bo tin tur bo dokumentonan na òrdu pa bo por entregá bo petishon kompleto.

Pa mas informashon Lokèt di Pèrmit ta alkansabel via e siguiente kanalnan:

Adrès:            Saliña 127 Eurobuilding (Banda di Subway)
Orario:           djaluna pa djaweps  08:00 – 15:00 or,  djabièrnè 08:00 – 12:00 or

Pa solamente petishon pa Transporte Eskolar 2025-2026 Lokèt di Pèrmit ta disponibel riba djasabra 26 di yüli, 9, 16 i 23 di ougùstùs. Por pasa hasi petishon entre 09:00 or pa 03:00 or.

MAS NOTISIA

Ministerio konserní: Maneho di Gobernashon, Planifikashon i Servisio Públiko