Publiká riba 22 Sèptèmber 2025
WILLEMSTAD – Reino Hulandes inkluso Kòrsou, Aruba i Sint Maarten ta partisipá e siman akí na e di 80 edishon di Asamblea General di Nashonnan Uní (AVVN) na New York. Den e Asamblea General akí lidernan mundial ta reflehá riba importansia di e organisashon i riba responsabilidat kolektivo pa un sistema multilateral mas inklusivo.
Promé Minister Pisas tabata presente awe, djaluna 22 di sèptèmber, na seremonia di e selebrashon di e 80 edishon hubileo di Nashonnan Uní. E aña akí e tin komo lema: “Leaders mark eight decades of the UN and reflect on the path ahead for a more inclusive multilateral system” (Lidernan ta marka ocho dékadanan di Nashonnan Uní i ta reflehá riba e kaminda p’adilanti pa un sistema multilateral mas inklusivo).
Promé Minister ta akompañá pa e siguiente miembro di delegashon:
Sra. Lise Gregoire-van Haaren, Representante Permanente di Reino na Nashonanan Uní, sra. Melissa Vásquez, Hèfe di Gabinete i konsehero di Minister Presidènt, sr. Djuric Comenentia, Sekretario General di Ministerio di Asuntunan General, i sra. Vanessa van Dijsseldonk, Kolaboradó di Gabinete di Minister Presidènt.
Reino Hulandes ta pone enfoke na AVVN riba pas i seguridat, kombatí probesa i desigualdat, atenshon pa klima i pais vulnerabel, reforma di Nashonnan Uní i protekshon di derechonan humano.
Ku e prioridatnan akí, Reino Hulandes ta kere den un Nashonnan Uní fuerte i kapás pa duna solushon pa desafionan global i pa protehá esnan mas vulnerabel.
