Publiká riba 19 Òktober 2025
WILLEMSTAD — Riba inisiativa di Minister di Desaroyo Ekonómiko, Roderick Middelhof, i ku sosten di Minister Charles Cooper di Ministerio di Tráfiko, Transporte i Planifikashon, a realisá adaptashon importante riba e alsera na Sha Caprileskade (Merkado Flotante).
E adaptashon akí ta inkluí un distinshon fisiko entre e área kaminda e komersiantenan di merkado flotante por para, i e área destiná pa peaton i kumpradó. E área lo ser señalá ku un marka shinishi riba e alsera ku ta distinguí unda e bendedo por pone su produkto i tambe unda e peaton/kumpradó por kana.
Segun Minister Middelhof, e medida akí ta un paso esensial pa trese mas orden i siguridat den e área, tantu pa e bendedó nan komo pa e pùbliko ku ta pasa of kumpra.
“Mi ta keda haltu den mi prinsipio: kumplimentu ku regla i lei, sin distinsion di ken bo ta. Tur hende, komersiante, negoshi of instansia, mester respeta regla di e pais. Si nos laga kos bai sin kòntròl, aki un par di dia nos peatonnan lo mester kana riba kaya mes of na otro banda di kaminda. Pa evita esaki, mi a tuma e desishon di pone e liña ku ta indiká kla te unda por tin produkto i unda peaton mester pasa. Asina nos ta duna espasio i siguridat, pero tambe ta manda un mensahe kla: Kòrsou tin regla,” Minister Middelhof a deklará.
E Minister a enfatisa ku su intenshon ta pa krea un área kaminda komersio hustu i sigur ta ser praktiká, ku ta benefisia tur hende envolví.
Tin di inspekshon di Ministerio di Desaroyo Ekonómiko lo sigui traha den estrecho kolaborashon ku e DMO i demas personanan i instansianan pa kontrolá ku tur bendedó ta kumpli ku tur regla.
Di e forma aki Minister Middelhof i kolega Minister Cooper ta sigui traha pa un Kòrsou mas miho i sigur!
