Publiká riba 01 Novèmber 2025
WILLEMSTAD – Riba djabièrnè, 31 di òktober 2025, Promé Minister sr. Gilmar Pisas a risibí e Sekretario General Suplente di Caricom, Dr. Armstrong Alexis. Dr. Alexis ta na Kòrsou pa e “50th Meeting of the Standing Committee of Caribbean Statisticians” di CARICOM, ku a tuma lugá e siman akí na Kòrsou. Esaki ta e promé reunion di CARICOM ku Kòrsou ta host.
E bishita akí tabata unu di kortesia kaminda Promé Minister Pisas i Dr. Alexis a papia tokante e disaster na Jamaica despues di orkan Melissa i kiko CARICOM i Reino ta hasiendo pa yuda.
Dr. Alexis tambe a duna un splikashon amplio tokante CARICOM i e varios agensianan ku CARICOM tin, manera ‘Caribbean Disaster Emergency Management Agency’ (CDEMA), ‘Implementing Agency for Crime and Security’ (IMPACS) i ‘Caribbean Public Health Agency’ (CARPHA).
Tambe a diskutí e situashon di seguridat den nos region entre Merka i Venezuela. Dr. Alexis a indiká un biaha mas ku Karibe mester keda un zona di pas.
E bishita a tuma lugá den un esfera ameno basá riba bon entendimentu i kolaborashon, pa sigui mantené un diálogo kontinuo na benefisio di Kòrsou.
