Publiká riba 05 Novèmber 2025
WILLEMSTAD, 4 di novèmber 2025 – Promé Minister di Kòrsou, Sr. Gilmar Pisas, a duna un diskurso durante e seremonia di “groundbreaking” di e proyekto Lake View Residence na Rif Sint Marie, realisá pa Janssen de Jong Caribbean i CWM Infrastructure.
Den su diskurso, Promé Minister Pisas a enfatisá ku e proyekto aki ta un ehèmpel di kon desaroyo ekonómiko i progreso por bai huntu ku rèspèt pa naturalesa, kultura i historia di nos pueblo.
“E tereno aki no ta solamente un lugá pa konstruí kas, pero tambe un sitio ku mester preservá su historia i identidat. Na e lugá akí a deskubrí restonan di nos pueblo indígena, un testimonio di bida i tradishon ku tabata eksistí hopi tempu promé ku nos a yega akí. Esaki ta pone nos rekordá ku kada desaroyo den tempu moderno mester bai huntu ku konsenshi di nos pasado,” sigun Promé Minister Pisas.
Segun e plan, solamente un parti chikí di e tereno lo wòrdu desaroyá, miéntras mas ku 70% lo keda preservá pa naturalesa, flora i founa lokal. E diseño di e proyekto ta integrá prinsipionan di sostenibilidat, inkluí uso di energia renobá i un harmonia visual ku e paisahe natural di e área.
E invershon aki ta spera di krea mas ku 200 kupo di trabou pa trabou lokal durante e fase di konstrukshon, i mas di 60 empleonan permanente despues ku e proyekto ta kla.
Promé Minister a indiká ku e desaroyo na Rif Sint Marie ta reforsá e kresementu di Banda abou komo un área di oportunidatnan nobo. El a yama mas invershonistanan lokal i internashonal pa sigui kontribuí den un Kòrsou ku ta krese di un forma sostenibel, manteniendo rèspèt pa naturalesa i kultura lokal.
“Nos Gobièrnu ta habri porta pa tur invershon ku ta balorá sostenibilidat i progreso ku rèspèt. Esaki ta e tipo di desaroyo ku nos ke mira mas riba nos isla,” asina’ki Promé Minister Pisas a finalisá su diskurso.
E Seremonia di “groundbreaking” a konta ku presensia di otro mandatarionan, representantenan di e dos kompania, miembronan di komunidat i otro invitadonan.
