Notisia

Willemstad – Ofisina Sentral di Statistik (CBS) ta kuminsá na luna di novèmber ku Enkuesta Anual di Empresanan: Parti II (Enkuesta di Koyuntura) pa aña 2025 bou di empresanan selektá.

E enkuesta tin komo meta pa kolektá informashon aktual tokante desaroyo di negoshi i desaroyo ekonómiko, asina mes komo opinhon di empresarionan riba e klima di invershon. Ta importante pa nota ku e enkuesta ta enfoká mas riba estimashon ku riba sifranan definitivo.

Enkuesta di Koyuntura  ta un sondeo bou di kompanianan ku dies òf mas trahadó, miéntras serka e kompanianan ku entre 3 te ku 9 trahadó lo hasi un muestra (steekproef). Total lo enkuestá mas o ménos 800 kompania.

Akinan por tuma nota di resultadonan di Enkuesta di Koyuntura pa aña 2024. E publikashon ta optenibel riba website di CBS www.cbs.cw.

Resultadonan di Enkuesta di Koyuntura pa aña 2024:

• Empresarionan a raportá un stabilidat den konfiansa ekonómiko durante 2024. E porsentahe di empresarionan ku a indiká un bahamentu di konfiansa a baha di 10 porshento pa 9 porshento. E porsentahe di kompanianan ku a indiká un mehorashon den konfiansa ekonómiko a baha levemente di 32 porshento pa 29 porshento, mientras ku e porshento di empresarionan ku a indiká no tin kambio a subi di 59 porshento na 62 porshento.
• E porsentahe di kompanianan ku ta ekspresá konfiansa den futuro a sigui subi, di 73 porshento pa un 75 porshento kompará ku 2023. Ademas, e porsentahe di kompanianan ku ta indiká di no tin konfiansa den futuro a baha di 8 porshento pa 5 porshento.
• Opinión riba klima di invershon a mehorá konsiderabelmente. E porshento di kompanianan ku ta indiká ku e klima di invershon ta bon a subi di 27 porshento na 32 porshento. E porshento di kompanianan ku ta indiká ku e klima ta malu a baha di 11 porshento pa 7 porshento.
• Kompará ku 2023, e porshento di kompanianan ku a indiká un bahada den ingreso a baha di 33 porshento na 25 porshento. Di otro banda, e porsentahe di kompanianan ku a indiká un oumento den ingreso a subi di 48 porshento pa 55 porshento.
• E índise di koyuntura basá riba e sifranan di konfiansa den futuro, persepshon di klima di invershon i desaroyo di benta ta indiká 127 na aña 2024. Esaki ta 13 punto mas haltu ku 2023.
• Den 2024, 73 porshento di kompanianan a indiká ku nan a logra un resultado positivo den nan negoshi. Esaki ta representá un oumento di 4 porshento kompará ku 2023 (69 porshento) i un oumento di 8 porshento kompará ku 2022 (65 porshento). Ademas, 27 porshento di e kompanianan enkuestá ta spera di raportá un resultado negativo. Esaki ta un bahada di 4 porshento kompará ku 2023 (31 porshento).

Pa mas informashon por download e relato kompleto di e resultadonan di Enkuesta di Koyuntura pa aña 2024 via di pagina inisial di e wèpsait di CBS www.cbs.cw

CBS ke gradisí tur e empresanan ku a yena e formulario. Sin nan yudansa CBS lo no por publiká e sifranan ariba menshoná.

MAS NOTISIA

Ministerio konserní: Maneho di Gobernashon, Planifikashon i Servisio Públiko