Publiká riba 06 Novèmber 2025
Kerido koleganan, Famianan di e víktimanan, Representantenan di sindikatonan i otro organisashonnan sivil, Kerido pueblo di Kòrsou, felis mainta!
Awe nos ta reuní akinan atrobe pa konmemorá un momentu doloroso ku ta keda marká pa semper den e historia di nos pais. Ya a pasa sinkuentiocho (58) aña despues di e dia fatal na aña 1967 ku un desgrasia a tuma lugá riba e tereno kaminda e brùg Reina Juliana tabata den konstrukshon. Tempu ta pasa lihé, pero e suseso ta ketu bai den nos memoria kolektivo pa motibu di e impakto ku e la hasi riba nos.
Den un solo momentu, un obra di progreso i speransa a bira un lugá di doló profundo pa nos sosiedat. Diessinku (15) trahadó yu di tera, hendenan ku tabata traha pa nan pan i di nan famia, a pèrdè nan bida repentinamente den e kaida di e brùg. Nan a sali kas e dia ei pa traha pa un Kòrsou mihó konektá, sin tene kuenta ku e palabranan “ayó” òf “te aweró” tabata pa último bia.
E dia ei nos isla a keda muda. E shòk a yega tur huki di nos komunidat. Nos a pèrdè tatanan, rumannan, yunan, amigunan i koleganan di trabou. E doló di 1967 a bira parti di nos memoria kolektivo: un herida ku tempu no ta kura, pero ku nos pueblo a siña karga ku dignidat i fortalesa. Pero den nos ora di tristesa i lágrima, nos pueblo a sa di hala mas serka di otro. Bisiña a yuda bisiña. Bomberonan, polisnan i boluntarionan, lokal i estranhero, a traha inkansabelmente pa salbá otronan, poniendo nan mes bida na peliger. E espíritu di unidat, di kompashon i di kurashi a bria mas fuerte ku nunka ántes.
E tragedia di e brùg ku a kai na 1967 a siña nos vários lès ku ta bálido te awe pa ku e posishon di trahadónan: progreso mester bai semper kompaña pa seguridat laboral i niun desaroyo no ta bal un solo bida. Kada proyekto grandi òf ehekushon di un plan di konstrukshon mester tene kuenta ku seguridat laboral. Esaki pasobra e labor di trahadónan, nan esfuersonan, nan bida ta e fundamènt di nos desaroyo. Ta p’esei nos tin ku keda traha pa mantené kondishonnan laboral ku ta adekuá pa tur trahadó.
Pero no opstante e tragedia hororoso aki, durante e sinkuentiocho (58) añanan ku a pasa, pueblo di Kòrsou a bira mas fuerte i mas inteligente. Pa e motibu ei, nos no ta bishitá pasado pa nos keda biba den tristesa, sino pa honra esunnan ku a pèrdè nan bida i pa nos sigurá ku e pèrdida aki no tabata pòrnada. Tambe pa pèrkurá ku nos progreso no ta kita ku nos tin ku honra e bida i labor di kada trahadó.
E brùg ku nos ta mira awe, konektando Punda ku Otrobanda, no ta solamente un obra di ingenieria, sino un monumento bibu, un símbolo di resiliensia, di unidat, i di determinashon pa nos sigui progresá, pero den union ku otro.
Komo Gobièrnu, nos lo sigui honrá e memoria di esnan ku nos a pèrdè na 1967, ku un kompromiso fuerte pa protehá kada bida ku ta sostené konstrukshon pa adelanto di nos nashon.
Na famianan ku kisas ainda ta biba e doló di boso pèrdida: boso doló a bira inspirashon pa nos pueblo. E sakrifisio ku boso sernan kerí a hasi pa nos progreso no tabata enbano. E ta un rekordatorio eterno pa un futuro mas sigur. Nos ta para na boso banda i ta spera ku e memoria di boso sernan kerí lo sigui inspirá yunan di Kòrsou pa konstruí brùgnan di kompashon, hustisia, union i speransa.
Finalmente, kerido pueblo di Kòrsou, laga nos konta e historia aki no solamente ku lágrima, pero tambe ku gratitut i speransa pa un mihó futuro pa Kòrsou.
Dios bendishoná Kòrsou i protehá nos pueblo di tur sorto di kalamidat.
Masha danki!