Publiká riba 25 Novèmber 2025
WILLEMSTAD – Riba djaluna, 24 di novèmber 2025, a tuma lugá e kickoff ofisial di Siman di Maneho di Krísis i Komunikashon di Krísis na Kòrsou. “Meskos ku henter Reino resientemente a selebrá huntu e éksito históriko di Curaçao Blue Wave, nos tambe mester traha huntu pa konstruí un Reino mas sigur i resiliente.” Ku e mensahe poderoso akí, Jandino Asporaat a habri e mainta ku un presentashon humorístiko pero alabes signifikante.
E Siman di Maneho di Krísis i Komunikashon di Krísis, ku ta tuma lugá di 24 pa 28 di novèmber, ta trese mas ku shen profeshonal riba tereno di maneho di krísis i komunikashon di krísis huntu. Representantenan di tur parti di Reino – inkluso Aruba, Kòrsou, Sint Maarten, Boneiru, Saba, Sint Eustatius i Hulanda – ta traha huntu pa fortalesé e koperashon den vários tipo di krísis. Meta di esaki ta pa realisá un Reino resiliente den kua partnernan ta sostené otro rápidamente i efektivamente.
Riba e promé dia a reflehá riba e éksito i retonan klave di e aña ku a pasa. Partisipantenan a wòrdu risibí dor di sr. Lesley Fer, kordinadó nashonal di krísis di Kòrsou i anfitrion di e siman, i tambe dor di sr. Gerbert Kunst, e Representante Hulandes pa Kòrsou, Aruba i Sint Maarten. Oradornan prinsipal a inkluí sr. Albert Martis, Direktor di Servisio Meteorológiko di Kòrsou i sr. Matthijs van Amelsfort, Direktor di Sentro Nashonal di Seguridat Sibernétiko na Hulanda (NCSC-NL).
E konferensia—awor den su di seis aña pa maneho di krísis i e di dos pa komunikashon di krísis—a wòrdu habrí ofisialmente pa Minister Charles Cooper, den su kalidat komo Vise Promé Minister di Kòrsou.
Un paso klave ku Kòrsou a kompartí ku su partnernan denter di Reino tabata finalisashon di e sentro di krísis nobo COC3. E sentro lo habri ofisialmente dentro di poko i lo sirbi komo un punto di koordinashon pa krísis i desasternan lokal, mientras ku e ta sirbi tambe komo un hub stratégiko den Reino. E sentro di konosementu asosiá tambe ta fortalesé kapasidat pa edukashon, entrenamentu i ehersisio, i ta sigurá ku konosementu ta wòrdu retené di forma sostenibel den region.
Den e próksimo dianan lo enfoká riba kon konhuntamente sigui desaroyá método i modelonan di trabou. E temanan ta varia di koperashon operashonal te na atendé menasanan ku ta pasa frontera. E énfasis ta riba prosesonan práktiko i rekonosibel ku por wòrdu apliká riba tur isla i na Hulanda.
E Siman di Maneho di Krísis ta wòrdu organisá dos biaha pa aña. Kada edishon, kombiná ku komunikashon di krísis, ta tuma lugá den un parti diferente di Reino. E aña aki, Kòrsou tin e honor di ta anfitrion di e evento.
