Publiká riba 27 Novèmber 2025
Na nòmber di Gobiernu di Kòrsou, nos kier ekspresá nos gran apresio pa boso kompromiso kontinuo ku bienestar di nos isla. Nos ta rekonosé e ròl esensial ku boso komo piskadó ta hunga den seguridat alimentario, patrimonio kultural, i vitalidat ekonómiko di Kòrsou.
Nos ta konsiente di e preokupashonnan ku a surgi resientemente i nos ta komprondé e impakto ku nan por tin riba boso trabou i boso bida. Minister di GMN, Sr. Pisas i tambe Minister di Desaroyo Ekonómiko, Dr. Middelhof, a sinta huntu i ta mira ku mester mas tempu pa studia e situashon ku mas profundidat mirando ku ta un situashon kompleho.
Nos tim ta evaluando tur informashon relevante pa garantisá ku kada desishon ku lo wordu tuma ta responsabel, bon informá, i konsiderá e realidatnan di nos komunidat di piskadó. Durante e periodo di evaluashon aki, nos ta pidi boso pa un tiki di pashenshi i komprenshon. Boso kooperashon ta duna nos e tempu nesesario pa por analizá e situashon ku kuido i sigui traha riba solushonnan ku ta husto, sostenibel, i benefisioso pa tur parti envolví.
Pa garantisá komunikashon habri i kolaborashon den futuro, gobiernu lo tin un reunión ku representante di komunidat di piskadó dia djarason, 15 di yanuari 2026.
Nos ta agradesé boso indulgensia i boso kontribushon kontinuo na Kòrsou.
