Willemstad – Resientemente, den kuadro di UNESCO International Year of Quantum Science, Ministerio di Desaroyo Ekónomiko (MEO) a envolví Kòrsou den un mundu di konektividat di dato, resilensia digital i e impakto disruptivo di quantum computing. E evento Curaçao Quantum Safe, ku tabata moderá pa Jacques Heide, a reuní huntu gobièrnu, sektor privá, institushonnan di konosementu i ekspertonan internashonal.
E mensahe prinsipal tabata kla: revolushon quantum no ta warda — Kòrsou mester aktua mesora.
E keynote Dimitri van Esch (Quantum Gateway Foundation, Hulanda) a duna un bista riba: kiko nos sa i tambe kiko nos no sa ainda tokante quantum, e kompetensia geopolítiko entre podernan na nivel mundial, e menasa di un posible “quantum apocalypse”, e ròl di retnan sosial den aselerá mal informashon, i e oportunidat úniko pa Kòrsou bira e promé “Quantum Security Island” den region.
Quantum computing: un avanse poderoso sin presedente
Quantum computing ta basá riba e lei di quantum mekánika — siensia di e partikulanan mas chikí. Kaminda kòmpiuternan klásiko ta konta ku bits (0 òf 1), kòmpiuternan quantum ta traha ku qubits, ku por ta 0 i 1 na mes tempu. Esaki ta permití ku sierto kalkulashonnan sumamente kompliká por ser hasí ku un velosidat inkreibel.
MEO: Kòrsou mester prepará awor pa quantum computing. E mensahe di apertura a bin di Gwido Jansen, di MEO. El a enfatisá ku Kòrsou no por warda mas, mester prepará mesora pa quantum computing — pa garantisá seguridat digital i pa oportunidatnan ekónomiko.
Den luna di Novèmber a tuma pasonan struktural pa logra esaki:
1. Re-lansamentu di Fundashon Lat-IX komo Curaçao Quantum Safe (CQS) E fundashon históriko Lat-IX, ku na 2004, tabata basá riba loke awor ta AMS-IX Caribbean, ta re-lansá komo Curaçao Quantum Safe (CQS) ku un mishon nobo: Hasi Kòrsou seif pa Quantum.
2. Akuerdo di kolaborashon ku Quantum Gateway Foundation E fundashon renobá Curaçao Quantum Safe a firma un akuerdo di kolaborashon ofisial ku Quantum Gateway Foundation di Dimitri van Esch. E kolaborashon aki ta fortifiká konosementu, konsenshi i preparashon di Kòrsou pa teknologia quantum.
3. Formashon di Curaçao Quantum Safe Coalitie CQS huntu ku tres partnernan prinsipal: Ministerio di Desaroyo Ekónomiko (MEO), BlueNap Americas i Universidat di Kòrsou (UoC), a firma un deklarashon di intension pa forma Curaçao Quantum Safe Coalitie. E speransa ta ku RAC i CBCS tambe lo uni pronto na e kolaborashon stratégiko i importante aki.
Aparte di e keynote, tabatin presentashonnan di: Nico Scheper, eksperto internashonal den interkambionan di internèt i kabelnan supmarino, Dwigno Puriel, Sekretario general di Ministerio di VVRP, Danilo Zabala, COO di Blue NAP Americas, Anil Sadhoeram, Chief Philosophy Officer, ku a guia e sala den fundamentonan di quantum mekánika, i Marc Samson, spesialista den ICT i “Yu di Kòrsou” for di Bélgika, ku a presentá un bista sólido di futuro basá riba AI–Quantum Konvergente.
E inisiativa Curaçao Quantum Safe ta sostené pa e fundashon Lat-IX renobá: Curaçao Quantum Safe huntu ku MEO, ku sosten di VBC i CITI. E meta ta pa logra un Kòrsou ku ta konsiente di i seif pa quantum, i tambe prepará pa reto i oportunidatnan digital di futuro.
