Minister Middelhof ta yama bon biní na e prome buelonan di LATAM for di Bogotá i Lima - Informashon tokante Gobièrnu di Kòrsou

Minister Middelhof ta yama bon biní na e prome buelonan di LATAM for di Bogotá i Lima

Desaroyo Ekonómiko
 

Minister Middelhof ta yama bon biní na e prome buelonan di LATAM for di Bogotá i Lima

Publiká riba 02 Desèmber 2025

Willemstad, 2 di desèmber 2025, LATAM, e airline group di mas grandi den Latino Amérika, su buelonan inougural for di Bogotá i Lima a aterisa ofisialmente na Kòrsou awe. Esaki ta un logro signifikante den fortifikashon di konektividat di nos isla pa amplia nos presensia den e merkado Sur Amerikano. Minister di Desaroyo Ekonómiko, Roderick Middelhof, tabata presente pa yama bon biní na e avion i tambe pa selebrá e momentu historiko aki.

LATAM ta un partner importante pa Kòrsou kual ta kontribuí pa sigui posishoná Kòrsou komo un destinashon turístiko prominente. Biaheronan for di e region di Sur Amérika semper ta buska destinashonnan outéntiko kaminda nan por sera konosí di aserka ku e habitantenan su kultura, historia i herensia.

E buelonan for di Bogotá lo keda efektuá 3 biaha pa siman riba djamars, djaweps i djadumingu. E ruta nobo: Lima – Kòrsou tambe lo ta 3 biaha pa siman, riba djamars, djabièrnè i djadumingu. E ruta for di Perú, ta kuadra ku Kòrsou su metanan stratégiko di habri mas konekshon di biahe for di Sur Amérika hasiendo Kòrsou mas aksesibel pa e region aki. Alabes e konekshonnan nobo di LATAM ta nifiká mas opshon di biahe pa nos pueblo lokal.

Durante su diskurso, Minister Middelhof a ekspresá su apresio profundo na LATAM i a gradisí tur partner enbolbí pa nan esfuersonan pa hasi e konekshon direkto nobo aki posibel.

“E buelonan direkto nobo aki ta un paso importante pa fortalesé nos presensia den Sur Amerika. Danki na e ret fuerte di LATAM, nos ta habri oportunidatnan nobo pa turismo, biahe di negoshi, i interkambio kultural entre nos komunidatnan.”

Na momentu di aterisahe, e buelonan inaugural a wòrdu risibí pa e truk nan di brantwer di nos aeropuerto, sigui pa un seremonia ofisial ku representantenan di gobièrnu, LATAM, Curaçao Airport Holding, CTB i tambe CHATA.

Ministerio di Desaroyo Ekonómiko ta felisitá LATAM ku e konekshonnan nobo aki i ta antisipá riba un partnership fuerte, di largu plaso ku ta kontribuí na kresementu duradero i oportunidatnan nobo pa nos dushi Kòrsou.