Publiká riba 03 Desèmber 2025
WILLEMSTAD – Riba djarason, 3 di desèmber 2025, Promé Minister sr. Gilmar Pisas i Minister di Edukashon, Siensia, Kultura i Deporte sr. Sithree van Heydoorn a risibí bishita di sr. Alexander Montiel, CEO di e sertamen di Miss Teen International, srta. Guizza Maria Steenvoorde, Miss Teen Universe 2025, srta. Thalina Gil, Miss Teen Curaçao 2025 i sra. Ayanette Statia, Direktor di QMQ Organisashon na Kòrsou.
Sr. Montiel i Srta. Steenvoorde, ku a gana e sertamen Internashonal na Punta Cana, ta di bishita pa asina huntu nan será konosi ku e kultura i áreanan turístiko di Kòrsou i pa wak e posibilidatnan pa promové nos isla den e área di beyesa internashonal. Sr. Montiel tambe ta selebrando 15 aña organisando e sertamen na diferente parti di mundu. Sr. Montiel i sra. Statia tambe a splika kon e sertamen di Miss Teen International no ta solamente pone un enfoke riba beyesa pero tambe ta sirbi komo un skòl di formashon i ta yuda e kandidatonan riba e parti sosial i varios otro áreanan mas.
Durante e enkuentro e mandatarionan a enfatisá ku nan ke sigui fortalesé e lazo entre beyesa, kreatividat i desaroyo hubenil riba nos isla. Promé Minister Pisas a indiká ku e sertamennan internashonal por habri porta pa pone Kòrsou den un plataforma mundial, ora nos hóbennan por krese den konfiansa, disiplina i liderato.
E bishita a tuma lugá den un ambiente di amistat i kolaborashon, ku tur hende a ekspresá nan deseo pa sigui traha huntu pa pone Kòrsou riba mapa internashonal den un manera digno i inspirativo.