Publiká riba 28 Yanüari 2026
WILLEMSTAD- Ministerio di Salubridat, Medio Ambiente i Naturalesa (GMN) den kuadro di kombatimentu di sangura a tuma nota di informashonnan publiká di kasonan konfirmá di Chikungunya na diferente pais den nos region. Resientemente, outoridatnan di Sürnam tambe a informá tokante kasonan detektá. Na e momentunan akí no tin indikashon di kasonan di Chikungunya na Kòrsou, pero pa prevení esaki mester tuma akshonnan preventivo.
Malesanan transmití pa sangura, manera Dengue, Zika i Chikungunya, ta konosí den nos region. Esaki ta mustra ku prevenshon ta di gran importansia, ya ku e sangura Aedes Aegipty, ku por transmití e vírùsnan, ta habitá den nos klima.
E forma mas efektivo pa prevení e malesanan akí ta pa evitá ku e sangura ta pika bo. E sangura ta mas aktivo durante oranan ku solo ta sali i ta baha. Si bo no por evitá di ta pafó na e momentunan ei, ta rekomendabel pa bisti paña koló kla ku manga largu i karson. Tambe ta rekomendá pa usa repelente na partinan di kurpa ku ta eksponé, siguiendo e instrukshonnan riba e emboltura.
Pa protehá personanan ku mobilidat limitá, manera esnan ku ta den kama òf den ròlstul, pero tambe beibinan, ta rekomendabel pa laga nan drumi bou di un moskitero/klamboe i pa usa hòr òf kortina di “gaas” na porta ku bentana pa tene sangura pafó di kas.
E medidanan di prevenshon akí ta konta tambe pa pasaheronan ku ta biaha pa diferente paisnan den region, inkluso Sürnam, kaminda e vírus di Dengue, Zika i Chikungunya ta aktivo aktualmente. Personanan ku ta regresá Kòrsou for di e paisnan ei i ku, despues di e biahe, ta sinti nan mes malu, ta keda rekomendá pa tuma kontakto ku un dòkter di kas via telefòn i indiká e síntomanan. Algun di e síntomanan ta: keintura haltu (riba 38,5°C) diripiente, doló den skarnir, doló di kabes, doló di lomba i di múskulo, stoma ta wal i bo por arohá.
Kombatimentu di sangura ta un responsabilidat komun. Ta importante pues pa kada siudadano tuma responsabilidat pa ku su propio salú i ta bon informá, pa asina nos por kontribuí huntu na prevení i kontrolá malesanan ku ta wòrdu transmití pa sangura. Esaki mientras ku Ministerio di Salubridat, Medio Ambiente i Naturalesa, via Departamento di Vektor di Salubridat Públiko, ta kontinuá su trabou di prevenshon den tur bario di Kòrsou.
Entre otro tin foyeto na diferente idioma disponibel ku ta kontené informashon tokante malesanan transmisití dor di e sangura Aedes Aegipty. E materialnan akí huntu ku potrètnan ta aksesibel den forma digital riba www.gobiernu.cw . Pa mas informashon por yama òf WhatsApp nos Hotline na +5999 527 0854.
Gobièrnu di Kòrsou ta sigui monitoriá e situashon di serka i lo informá komunidat debidamente ora esaki ta nesesario.
