Publiká riba 08 Febrüari 2026
WILLEMSTAD – Directie Risicobeheersing & Rampenbeleid (DRR) djaweps, 5 di febrüari último, a organisá un masterclass tokante desaroyo geopolítiko mundialmente. Na e seshon a partisipá diferente profeshonal i ‘stakeholdernan’ ku ta traha den maneho di krísis, seguridat i planifikashon stratégiko.
E oradó prinsipal di e masterclass tabata señor Rob Bauer, eks Komandante di Forsanan Armá di e forsa armá Hulandes. Alabes sr. Bauer a sirbi komo presidente di e Komishon Militar di NATO ku ta e rango militar mas haltu den NATO. Aktualmente, sr. Bauer ta laborá komo profeshonal na Deloitte.
Sr. Bauer a ser kompañá pa dos eksperto ku tambe a kompartí un parti di nan konosementu i eksperensia durante e masterclass. Ta trata aki di sr. Sjoerd van der Smissen, partner na Deloitte Hulanda i enkargá ku Gobernashon i Servisionan Públiko, i sra. Eleonora Russell ku ta speshalista den komunikashon stratégiko ku afinidat pa krísis.
Durante e masterclass, e partisipantenan a haña un mihó komprendementu di e situashon geopolítiko mundial, inkluso e tenshonnan internashonal i e impakto ku esakinan por tin riba stabilidat i seguridat regional. Alabes, a enfatisá riba e importansia di preparashon i komunikashon efektivo promé, durante òf después di un situashon di krísis òf kalamidat.
Pa DRR e masterclass akí ta duna un kontribushon importante pa fortalesé konosementu i preparashon di e organisashonnan i profeshonalnan involukrá den maneho di kalamidat i krísis. E masterclass akí tambe ta e promé aktividat ku ta ser organisá dor di e ‘kenniscenter crisisbeheersing’ ku ta resortá bou di DRR. Enfoke di e ‘kenniscenter crisisbeheersing’ ta investigashon, akumulashon di konosementu i análisis di desaroyonan relevante pa maneho di kalamidat i krísis.
DRR tin e intenshon di organisá mas masterclass i otro seshonnan informativo den futuro, ku e meta pa sigui fortalesé kapasidat, konosementu i preparashon di profeshonalnan i institutonan relevante den e área di maneho di krísis i kalamidat.
