Willemstad – Konseho di Minister a akordá e Kuadro di Vishon di Sentro di Siudat 2026–2035, ku un perspektiva te 2045. Ku e desishon aki, Gobièrnu di Kòrsou ta dal un paso importante den direkshon di un desaroyo sostenibel, integral i prepará pa futuro di e sentro históriko di Willemstad.
E kuadro di vishon ta ofresé un kompas gubernamental pa desaroyo sosial, ekonómiko i planifikashon urbano di e sentro históriko. E sentro di siudat ta wòrdu posishoná komo un lugá bibu i aksesibel pa biba, traha, ehersé komèrsio, invertí i topa, tantu pa residente komo pa bishitante.
A desaroyá e vishon den estrecho kolaborashon ku stakeholdernan di e diferente distriktonan, inkluso representante di residentenan i empresarionan. E forma di traha huntu aki ta forma e base pa un sosten amplio i responsabilidat kompartí den implementashon.
Minister di Desaroyo Ekonómiko, señor Roderick Middelhof, ta enfatisá e importansia di fortalesé e base ekonómiko den e vishon aki:
“Ku e kuadro di e vishon aki, nos ta fortalesé no solamente e kalidat planifikashon urbano di nos sentro di siudat, sino tambe su fundeshi ekonómiko. Willemstad mester bira un lugá kaminda komèrsio lokal, inovashon i invershonnan ta bin huntu. Pa medio di diversifikashon i kolaborashon, nos ta konstruí un ekonomia resiliente ku ta krea oportunidat pa nos residentenan i ku ta sigui ta atraktivo pa partnernan internashonal.”
Minister di Tráfiko, Transporte i Planifikashon Urbano, señor Charles Cooper, tambe ta suprayá e importansia infrastruktural i sosial di e vishon. Nos sentro di siudat ta e kurason históriko i kultural di Kòrsou. Ku e kuadro di vishon aki nos ta skohe pa un maneho integral kaminda patrimonio, kalidat di bida i espasio públiko ta tene man. Nos ta invertí den un sentro di siudat aksesibel, sigur i atraktivo, no solamente pa awe, pero tambe pa e futuro generashon.
Pa resumí, e kuadro di vishon ta opta pa un manera integral di traha, kaminda kalidat di bida, inklushon sosial, protekshon i fortalesimentu di herensia, diversifikashon ekonómiko, bio-bibienda mesklá, empresarismo, inovashon i un espasio públiko atraktivo ta sentral i ta reforsá otro. E ta pone énfasis riba e karakterístikanan propio i nesesidatnan di Punda, Otrobanda, Pietermaai i Scharloo, i tambe riba e konekshon ku bario rònt di e sentro di siudat.
Ku un strategia di desaroyo repartí den fase te 2045, e kuadro di vishon ta ofresé un kuadro kla i realístiko pa implementashon, monitoreo i ahuste ora ta nesesario.
E dokumento kompleto di e vishon ta disponibel via: https://gobiernu.cw/nl/document/visiekader-binnenstad-2026-2035/