Notisia

Willemstad – Pa di promé biaha, Konseho di Minister a aprobá formalmente instalashon di un struktura interministerial spesífiko pa atendé tema di Seguridat Alimentario i Soberania Alimentario na Kòrsou. E inisiativa aki a wòrdu presentá pa Minister di Desaroyo Ekonómiko, sr. Roderick Middelhof, komo parti di un bista stratégiko riba fortalesimentu di nos kapasidat nashonal pa garantisá produkshon, disponibilidat i seguridat di alimento.

Ku e desishon aki, Gobièrnu ta pone un paso importante den kordinashon struktural entre ministerionan, ku MEO den un ròl sentral di liderato i integrashon ekonómiko. Seguridat alimentario no ta solamente un reto agríkola, sino tambe un tema ekonómiko, sosial i di salú públiko ku ta rekerí un enfoke integral.

Un stuurgroep, presidí pa Minister Middelhof, huntu ku e minister di Salú, Medio Ambiente i Naturalesa (GMN) i e minister di Tráfiko, Transporte i Planifikashon Urbano (VVRP), lo sirbi komo órgano di guia stratégiko. E kolaborashon aki ta reflehá e konvikshon ku seguridat alimentario ta un responsabilidat kompartí, kaminda kada ministerio ta aportá su eksperensia i kompetensia spesífiko.

Bou di e stuurgroep lo funshoná un projectgroep interministerial, presidí pa direktor di Sektor Empresarial di MEO, sra. Mariëlla Olaria-Maduro, huntu ku direktornan di GMN i VVRP. E grupo aki lo ta responsabel pa implementashon operashonal, kordinashon tékniko i monitoreo di e akshonnan konkreto.

Entre e metanan prinsipal di e projectgroep tin:

• ⁠Koordiná i garantisá ehekushon di plannan eksistente i nobo riba seguridat alimentario.
• ⁠Fortalesé maneho, regulashon i kuadro legal relevante.
• ⁠Stimulá kolaborashon estrecho entre gobièrnu, sektor privá, agrikultornan, kriadónan di bestia i otro stakeholdernan.
• ⁠Impulsá modernisashon i profeshonalisashon di sektor agríkola i di krio di bestia.
• Promové un modelo di produkshon duradero, efisiente i resiliente pa enfrentá kambionan klimátiko i retonan internashonal.

Minister Middelhof, komo minister responsabel pa desaroyo ekonómiko, ta mira seguridat alimentario komo un pilar fundamental pa fortalesé nos ekonomia lokal, redusí dependensia di importashon i krea oportunidat nobo pa emprendementu i inovashon. Na mes momento, e minister ta rekonosé ku sin e aporte di GMN riba salú i seguridat di produkto i sin planifikashon teritorial adekuá di VVRP, un sistema alimentario fuerte no por wòrdu realisá.

E struktura nobo aki ta marka un paso stratégiko den konstrukshon di un sistema alimentario mas robusto pa Kòrsou, unu ku ta protehá konsumidónan, sostené produktornan lokal i kontribuí na stabilidat ekonómiko di nos pais.

Minister Middelhof ta invitá tur stakeholder relevante pa sigui partisipá aktivamente den e proseso aki, pa asina traha huntu na un futuro alimentario mas sigur i duradero pa Kòrsou.

Entrega ofisial di landsbesluit na direktor empresarial señora Mariëlla Olaria-Maduro

MAS NOTISIA

Ministerio konserní: Desaroyo Ekonómiko