Publiká riba 04 Mart 2026
Willemstad – Pa por haña un bista mas éksakto di e situashon di eventual Yu di Kòrsou ku ta pegá den Medio Oriente, Gobièrnu ta pidi esnan konserní pa yena un formulario di kontakto den kaso di krisis. Esaki ta nesesario pa outoridatnan di Reino Hulandes por, determina miho e kantidat i tipo di asistensia nesesario, pa asina por ofresé asisteńsia konsular efikas i rápido. Esaki debí na e situashon insegur den Medio Oriente. Aktualmente e formulario di kontakto den kaso di krísis ta konta pa hende ku nashonalidat Hulandes ku na e momentunan aki ta na Israël, Palestina, Jordanië, Iran, Irak, Libanon, Oman, Bahrein, Koeweit, Qatar, Saudi-Arabië i Emiratonan Árabe Uní.
Pa yena e formulario subi https://crisisregform.apps.eu-1c.mendixcloud.com te ku dia 6 di mart próksimo pa 12’or di mèrdia, ora Hulandes. Despues no ta posibel mas pa yena e formulario konserní. Ta bon pa wak si bo situashon ta kuadra ku e kriterionan, prome di yen’e. E posibilidatnan pa por duna konseho i yudansa ta limitá i ta diferensiá di pais i di region den e teritorio di krisis.
Gobièrnu di Kòrsou ta kòrda tur hende konserni pa sigui e desaroyonan i e situashon di seguridat i pa prepara pa diferente senario. Ora tin mester di yudansa por yama e sentro di kontakto di NederlandWereldwijd, na e numbernan + 31 247 247 247 òf via Whatsapp +31 857 737 400.
