Desishonnan di djárason 4 di mart 2026

Desishonnan relashoná spesífikamente ku asuntunan di pais riba nivel nashonal di djárason, 4 di mart 2026:

1. Plan di ‘Maneho di Krísis pa menasanan Geopolítiko Kòrsou’ (Ministerio di Asuntunan General)

Konseho di Minister ta bai di akuerdo ku e plan di ‘Maneho di krísis pa Menasanan Geopolítiko’. Tur servisionan gubernamental i organisashonnan enbolbí, mester adaptá nan propio plan pa kombatí riesgo i maneha krísis i sòru pa esaki ta konektá ku e Profil di Riesgo di Kòrsou i reglanan vigente pa maneho di kombatí riesgo i maneha krísis. Direktor di Direktorado di kontròl di Riesgo i Maneho pa Kalamidat (DRR) ta koordiná e trayekto ku lo sigui mas aleu.

2. Plan di maneho ‘Red tape and Cost of Doing Business’ (Ministerio di Desaroyo Ekonómiko)

Konseho di Minister ta bai di akuerdo ku e desishon ya tumá tokante di e plan di maneho ‘Red Tape and Cost of Doing business’. A traha e plan teniendo kuenta ku e evaluashon di Komishon Nashonal di Reforma Kòrsou (NHC). Presidente di NHC ta koordiná e proseso ku lo sigui mas aleu.

3. Modifikashon di dekreto nashonal pa ehekushon di rekargo di seguridat di aviashon (Ministerio di Tráfiko, Transporte i Planifikashon Urbano)

Konseho di Minister a bai di akuerdo ku e rapòrt i dekreto nashonal konseptual, konteniendo medidanan general, pa modifiká e dekreto nashonal pa ehekushon di rekargo di seguridat di aviashon (Landsbesluit uitvoering luchtvaartveiligheidsheffing). E desishon ta tumá a base di e konseho di Direktorado di Lei i Asuntunan Hurdídiko i proposishon di Minister di Tráfiko, Transporte i Planifikashon Urbano (VVRP). Ta presentá e dokumentonan aki na Gobernador pa ratifikashon.

4. Instrukshon pa Reunion di Konseho di Minister di Reino di dia 6 di mart 2026 (Ministerio di Asuntunan General)

Konseho di Minister ta bai di akuerdo ku instrukshonnan duná na Minister Plenipotensiario di Kòrsou pa e Reunion di Konseho di Minister di Reino di dia 6 di mart 2026. E instrukshonnan aki enserá:

• e Tratado di Nashonnnan Uní tokante transparensia di un arbitrahe basá riba tratadonan entre invershonista i estadonan.
• e Tratado tokante di servisionan aéreo entre Reino Hulandes (na benefisio di Kòrsou) i Noruega;
• e Tratado tokante servisionan aéreo entre Reino Hulandes (na benefisio di Kòrsou) i Suesia;
• e Tratado tokante servisionan aéreo entre Reino Hulandes (na benefisio di Kòrsou) i Dinamarka;
• e proposishon di Lei di Reino pa reglanan pa finansa públiko sostenibel di Aruba (‘Rijkswet houdbare overheidsfinanciën Aruba’);
• e proposishon di Lei di Reino tokante formulashon di artíkulo 38, miembro 2, di Statüt di Reino.

5. Suministro di informashon na Parlamento tokante biahenan pa eksterior di ministernan (Ministerio di Asuntunan General)

Konseho di Minister ta bai di akuerdo pa informá Parlamento di biahenan di ministernan, solamente ora ta trata biahe di trabou. Minister di Asuntunan General ta presentá e proposishon aki na Presidente di Staten. Despues di un eventual aprobashon di Staten lo registrá esaki den dokumento di maneho òf protokòl.

6. ‘Memorandum of Understanding (MoU)’ entre Kòrsou i Florida Institute of Technology (Ministerio di Enseñansa, Siensia, Kultura i Deporte)

Konseho di Minister ta bai di akuerdo ku e ‘Memorandum òf Understanding (MoU)’ entre entidat hurídiko públiko Kòrsou i Florida Institute of Technology, pa ehekushon di un programa di interkambio. Ta apoderá Minister di Enseñansa, Siensia, Kultura i Deporte pa firma e MoU aki na nòmber di entidat hurídiko Kòrsou. Lo presentá e dekreto nashonal konseptual na Gobernador pa firma.

MAS NOTISIA