Publiká riba 07 Aprel 2026
Willemstad – Di 9 pa 14 di aprel próksimo lo tuma lugá e di 21 seshon di e Foro Anual di Union Oropeo i e 13 Paísnan di Ultramar di Union Oropeo (LGO), na hermana isla Aruba. Na mes momento lo tuma lugá e Konferensha Ministerial di e Asosiashon di Paísnan di Ultramar (OCTA). Un delegashon di Gobièrnu di Kòrsou liderá pa Minister di Salubridat, Medio Ambiente i Naturalesa, sr. Tyron Boekhoudt, lo partisipá na e foro i e Konferensha Ministerial di OCTA.
Bou di e areglo di LGO vigente e foro anual ya menshoná ta obligatorio i ta forma e plataforma di mas haltu pa diálogo polítiko i tékniko entre Komishon Oropeo, e tres paísnan miembro di Union Oropeo ku LGO (Dinamarka, Fransia, Ulanda) i e 13 paísnan di Ultramar, ku ta: Aruba, Boneiru, Kòrsou, Polinesia Fransés, Groenland, Nieuw-Caledonië, Saba, Saint Barthélemy, Saint Pierre-et-Miquelon, St. Eustatius, Sint Maarten, Terres Australes et Antarctique i Wallis et Futuna.
Aña pasá e gobièrnu aktual a nombra sr. Eduard Braam komo konsehero di maneho na Brussel, ku e tarea prinsipal pa logra mas tantu proyekto i programa Oropeo ku ta posibèl pa pais Kòrsou. Sr. Braam tambe lo forma parti di e delegashon di Gobièrnu di Kòrsou i su partisipashon lo brinda un bon oportunidat pa riba e nivel di mas haltu den e relashon entre Kòrsou i Union Oropeo trese e proyektonan prioritario di nos pais pa dilanti.
Dianan 9 i 10 di aprel 2026, durante di e promé dos dianan di e foro, interkambionan tékniko tripartit entre kada LGO, su país miembro di Union Oropeo na kual e ta pertenesé i Komishon Oropeo ta tuma lugá. Den e reunionnan aki ta diskutí e programashon di e fondonan ku Union Oropeo ta pone disponibel pa e desaroyo sosial i ekonómiko pa kada LGO individual i regional. Pa Kòrsou tin aktualmente tres (3) trayekto ta kana: e programashon teritorial a base di e di 11 Fondo Oropeo di Desaroyo (EDF), e programashon regional a base di e di 11 EDF i e asina yamá ‘Multiannual Indicative Programme 2021-2027 (MIP)’ tantu teritorial komo regional.
Dia 11 di aprel lo tuma lugá e Konferensha Ministerial di OCTA presidí pa e aktual Presidente di OCTA, Promé Minister Mike Eman di Aruba. Durante di e konferensha aki e direktiva diario saliente lo duna kuenta i rason riba su maneho atministrativo i finansiero i e konferensha lo diskutí entre otro tokante di e rumbo nobo pa e asosiashon i tambe lo dediká un seshon riba e areglo di LGO nobo ku aktualmente ta ser negoshá. E areglo di LGO nobo lo kubri e período di 2028 pa 2034 i entre otro ta proveé den ayudo finansiero pa e 13 LGO di kasi un miyar Euro kompará ku e 500 miyon Euro di e areglo aktual. Tambe e areglo nobo to habri kaminda pa e paísnan di Ultramar sea direktamente o indirektamente por medio di e país miembro di Union Europeo ku nan ta ligá na dje di fia plaka serka Union Oropeo. Tambe e areglo nobo ta hasi posibèl pa e LGO hasi mihó uso di e mekanísmonan di invershon Oropeo eksistente. Menos positivo di e areglo nobo ta ku su ophetivo ta pa baha e frekuensia di e momentunan di diálogo entre e tres partnernan. Por ehèmpèl, lo kier limitá e foro di en bes di un biaha tur aña pa kada dos aña i e reunionnan tripartit ku sa organisá 4 biaha pa aña na Brussel na 3 biaha pa aña.
Dia 12 di aprel Gobièrnu di Aruba lo organisá un ekskurshon pa un proyekto finansiá dor di fondonan Oropeo i un enkuentro na Universidat di Aruba. E mesun anochi lo tuma lugá un enkuentro entre Sekretario di Estado di Asuntunan di Reino, sr. Eric van der Burg i e delegashonnan di e 6 LGO Ulandés. Dia 12 di aprel tambe lo kuminsá den oranan di atardi ku enkuentronan riba e nivel di mas haltu entre e Eurocommisaris pa partnershipnan internashol, sr. Jozef Síkela i e LGO i nan respektivo paísnan miembro di Union Oropeo. E tipo di enkuentronan aki lo sigui dia 13 di aprel.
E di 21 Foro di Union Oropeo i e paísnan di Ultramar Oropeo mes lo tuma lugá dialuna, 13 di aprel, siguí pa un konferensha di invershon e mesun atardi. E konferensha di invershon lo transkurí durante di dianan 13 i 14 di aprel. Su meta prinsipal ta pa yega na proyektonan konkreto di invershon pa kada LGO. Pa Kòrsou e 4 proyektonan konkreto ku den koopershon estrecho entre sektor privá i gobièrnu a ser identifiká ta: 1. Blue Nap: dirigí riba ekspanshon di e konektividat entre Kòrsou, área di Latino Amérika i Karibe i Oropa; 2.Establesimentu di un parke di mulina adishonal dor di Aqualectra; 3. Desaroyo di un instalashon portuaria dor di Curinde na Koningsplein; 4. Establesimentu di un sentro regional di logístika humanitario i di krísis na Kòrsou.
Por lo general mester wak e konferensha di invershon aki tambe den kuadro di e afán di Union Oropeo pa implementá un agènda di transformashon den e LGO kaminda invershonnan den sektornan manera por ehèmpèl energia, konektividat digital, i infrastruktura mester forma e empuhe pa logra esaki. Ku un aserkamentu dirigí riba envolvimentu di agensianan finansiero di Union Oropeo den e relashon ku e LGO Union Oropeo kier inkluí su LGO den e asina yamá ‘Global Gateway Strategy’ ku ta un strategia ku a ser inisiá na 2021, ku básikamente pa medio di invershonnan kuantioso (pa un total di 300 miyar Euro) Union Oropeo kier alsa i fortifiká su presensia i posishon polítiko den mundu. Den e kuadro aki e LGO ku ta geográfikamente lokalisá rònt mundu ta ser konsiderá komo stratégikamente di importansha pa Union Oropeo.
E konferensha di invershon ta di sumo importansia pa Kòrsou i pa e motibu akí, huntu ku e delegashon di 4 persona lídera pa Minister Boekhoudt, un delegashon di mas ku dies persona prinsipalmente prosedente di sektor privá lo ta na Aruba dianan 13 i 14 di aprel 2026 pa partisipá na e konferensha.
