WILLEMSTAD- Djabièrnè 8 di mei 2026, a tuma lugá na Sentro di Detenshon i Korekshon Kòrsou un bunita selebrashon di dia di mama spesial pa tur klientenan di departamentu di hende muhé.
Minister di Hustisia mr. Shalten Hato i su Kabinèt konhuntamente ku personal di SDKK a organisá un bunita aktividat kaminda tur kliente hende muhé, por a partisipá i tambe selebrá. E título di e mainta tabata: “ E Muhé ku ta perseverá”. Esaki tabata komo un reflekshon i motivashon pa kada un presente, ilustrando ku bo por a pasa den hopi kos den bo bida i pasado, pero bo mester keda perseverá pa futuro.
Na okashon aki a hiba palabra sr.Anthony Hasselemeijer komo direktor suplente ku a pone énfasis riba e forsa di un mama i tambe Minister di Hustisia Shalten Hato ku a felisitá i tambe a duna gradisimentu i apresio pa e trabou ku kada mama ta hasi diariamente.
Mas aleu tabata tin un momentu pa gradisí Dios ku Pastor Eric Jacobino i a kontinuá ku un tremendo tempu pa konektá ku otro pa medio di spèl dor di sr. Shenyo Bokshoven, presentashon di sra. Ariadna Nicasia-Schoop ku a duna un charla edukativo, titulá bo pensamentu nobo i bida nobo. Tambe durante e selebrashon tabata tin entretenimentu musikal di Eric Jacobino & Co Band i un presentashon yena ku ambiente di nos artista lokal Dibo D.
Finalmente e klientenan a disfrutá di un sukulento bufèt i a risibí un bunita regalo den kuadro di dia di mama. Klientenan di departamentu di hende muhé a keda sumamentu kontentu i gradesido pa e atenshon duna nan durante e bunita selebrashon ku Minister Shalten Hato a organisá na SDKK.
