Publiká riba 03 Yüni 2026
Bogotá, Colombia – 3 yüni – Minister di GMN,Tyron Boekhoudt, a tene un reunion produktivo ku Viceminister di Salubridat Públiko di Colombia, Dr. Jaime Urrego. E reunion a tuma lugá den kuadro di e esfuersonan di Kòrsou pa sigui mehorá aksesibilidat i kalidat di kuido pa nos pueblo.
Durante e reunion, a deliberá ampliamente riba diferente reto ku Kòrsou ta enfrentá aktualmente. Un di nan ta e listanan di espera pa kuido spesialisá. E dos delegashonnan a interkambiá eksperensia tokante posibel solushonnan pa e problematikanan aki, maneho di prevenshon i manera mas efisiente di organisá servisionan di salú.
Un tema importante durante e reunion tabata e kolaborashon eksistente entre Kòrsou i Colombia riba tereno di kuido. Durante e reunion, Viceminister Urrego a duna di konose ku pashentnan ku ta ser referí pa SVB pa tratamentu na Colombia por benefisiá di tarifanan konsiderablemente mas favorabel pa kuido spesialisá. Esaki por kontribuí na kontrol di gastunan di salú, alabes permitiendo ku mas pashènt por risibí e kuido ku nan mester sin mester warda muchu largu.
Ademas, Dr. Urrego a kompartí su vishon riba prevenshon den kuido di salú i e ròl importante ku prevenshon ta hunga den redukshon di preshon riba sistemanan di salú. Minister Boekhoudt a enfatisa ku Kòrsou ta duna hopi balor na interkambio di konosementu i kolaborashon internashonal komo instrumentonan importante pa logra mehorashonnan duradero den sektor di salú.
“Nos ta akí pa siña, kolaborá i identifiká solushonnan konkreto ku por kontribuí direktamente na mehor kuido pa nos pueblo. Tur oportunidat pa redusí listanan di espera i hasi kuido di salú mas aksesibel meresé nos atenshon kompletu,” segun Minister Boekhoudt.
E bishita di trabou ta forma parti di un eksplorashon mas amplio di oportunidatnan pa fortifiká kolaborashon regional riba tereno di salú i identifiká posibilidatnan nobo ku por benefisiá nos pueblo.