MINISTER MIDDELHOF TA HASI E PROMÉ PASO PA ELIMINÁ VISA DOMINIKANO I FORTALESÉ KOOPERASHON BILATERAL, KOMERSIO I INVERSHON - Informashon tokante Gobièrnu di Kòrsou

MINISTER MIDDELHOF TA HASI E PROMÉ PASO PA ELIMINÁ VISA DOMINIKANO I FORTALESÉ KOOPERASHON BILATERAL, KOMERSIO I INVERSHON

Desaroyo Ekonómiko
 

MINISTER MIDDELHOF TA HASI E PROMÉ PASO PA ELIMINÁ VISA DOMINIKANO I FORTALESÉ KOOPERASHON BILATERAL, KOMERSIO I INVERSHON

Publiká riba 04 Yüni 2026

Bou di mandato di Promé Minister, señor Gilmar ‘Pik’ Pisas, Minister di Desaroyo Ekonómiko di Kòrsou, señor Dr. Roderick Middelhof, a sostené un reunion ofisial ku Minister di Relashonnan Eksterior di República Dominicana, señor Roberto Álvarez, den kuadro di un bishita di trabou na República Dominicana.
Durante e reunion, ambos pais a firmá un akuerdo den kua nan a reafirmá nan kompromiso pa sigui fortalesé e relashon kooperativo entre Kòrsou i República Dominicana. Resientemente Gobiernu di Kòrsou a kuminsa tuma e pasonan nesesario pa eliminá visa pa siudadonan Dominikanonan ku ta deseá bishitá Kòrsou, un paso ku por tin un impakto importante riba turismo, komersio i desaroyo ekonómiko.
Tambe a enfoká riba oportunidatnan pa profundisá e kooperashon bilateral riba tereno di komersio, invershon, konektividat, turismo i desaroyo. Ambos delegashon a ekspresá nan deseo pa sigui traha riba inisiativanan ku lo kontribuí na un relashon mas estrecho i benefisioso pa ambos pais.
Den e reunion, Minister Middelhof i Minister Álvarez a deliberá riba e gran potensial ku tin pa amplia interkambio komersial, promové invershonnan, fortalesé konektividat i kreá oportunidatnan nobo di kooperashon ekonómiko. Tambe e importansia di stimulá inovashon den kooperashon regional i di fortalesé integrashon entre e territorionan insular di Karibe komo motor pa kresementu sostenibel, kreashon di oportunidatnan nobo i prosperidat kompartí, a keda suprayá.
Komo parti di e kompromiso aki, Kòrsou a reiterá su respaldo na e inisiativa “Alianza de Territorios Insulares para el Desarrollo Económico de la Región del Caribe” (Akuerdo Transcaribe), ku tin komo meta prinsipal pa fortalesé kooperashon ekonómiko entre e territorionan insular di region.
E progreso alkansá den e trayekto pa kita e visa Dominikano lo no tabata posibel sin e vishon i sostén di Promé Minister, señor Gilmar “Pik” Pisas, kende a pone e tema aki haltu riba e agenda gubernamental. Bou di su liderazgo, e desishonnan nesesario a keda tumá pa impulsá e proseso aki i pa habri e kaminda pa un relashon mas fuerte entre Kòrsou i República Dominicana.
Minister Middelhof a indiká ku e pasonan ku a wòrdu tuma ta forma parti di un vishon mas amplio pa habri merkadonan nobo, atraé mas invershon, stimulá komersio regional i fortalesé posishon di Kòrsou komo un aliado stratégiko den Karibe.