Publiká riba 11 Yüni 2026
WILLEMSTAD – Na okashon di mensahenan ku resientemente ta sirkulá via medio sosial tokante un supuesta desaparishon di señor Jordan Pietersz, Minister Plenipotensiario Interino di Kòrsou, señor Errold T. Bishop, a informá Promé Minister di Kòrsou Gilmar Pisas por eskrito tokante e konklushonnan i verifikashonnan realisá dor di Gabinete di Minister Plenipotensiario di Kòrsou (Kas di Kòrsou).
A kontinuashon ta sigui e teksto integral di e karta.
Estimado Promé Minister,
Mediante e karta aki mi ta dirigí mi mes na bo den mi kapasidat di Minister Plenipotensiario Interino di Kòrsou, pa motibu di mensahenan ku ta sirkulá den diferente medio di komunikashon sosial tokante un supuesto desaparishon di un empleado di Gabinete di Minister Plenipotensiario di Kòrsou (Kas di Kòrsou), esta señor Jordan Pietersz.
Kas di Kòrsou a tuma nota di e publikáshonnan aki, sin embargo mi ta deseá pa enfatisá ku Kas di Kòrsou no a ser kontaktá dor di famianan, polis, ni ningun otro outoridat kompetente tokante un posibel desaparishon di señor Jordan Pietersz.
Den kuadro di un maneho responsabel komo dunadó di trabou, Kas di Kòrsou a hasi un verifikashon interno pa determiná si tin algun notifikashon òf deklarashon ofisial di desaparishon registrá serka e instansianan kompetente den Reino Hulandes. Basá riba e informashon aktualmente disponibel, nos no tin indikashon ku un notifikashon di e índole ei a ser registrá.
Ademas, por ser indiká ku señor Pietersz no a mantené kontakto ku Kas di Kòrsou durante un periodo largu di tempu.
Tambe, for di e atministrashon interno di personal a resultá ku señor Pietersz, durante su periodo di empleo den pasado na Kas di Kòrsou, tabata ousente na varios okashon pa periodonan largu sin notifikashon previo ni komunikashon ofisial na mi Gabinete.
Ounke basá riba e informashon aktual ta parse ku no tin un notifikashon ofisial di desaparishon, Kas di Kòrsou ta konsiderá importante pa sigui monitoriá e asuntu aki ku e atenshon i alertidat apropiá. Si surgi kualke informashon nobo òf sirkunstansianan relevante, Kas di Kòrsou lo aktua di akuerdo ku e responsabilidatnan i kuadronan legal vigente.
Mi ta spera ku esaki mi a informá bo sufisientemente pa e momentu aki.
Atentamente,
Errold T. Bishop
Minister Plenipotensiario Interino
