Publiká riba 03 Yüli 2026
Willemstad, 1 di yüli 2026 – Ku un total di 24 graduado nobo, Instituto pa Formashon den Enfermeria i Enseñansa (IFE) a pone un otro paso importante den e fortalesementu di sektor di kuido na Kòrsou. E graduadonan a haña nan diploma komo doktersassistent, verpleegkundige, verzorgende IG i apothekersassistent.
E seremonia ta sigui e graduashon di 5 operatiekamerassistent djaluna 30 di yüni, esaki ta demonstrá ku e invershonnan den enseñansa i formashon di personal di kuido ta dunando resultadonan konkreto.
Den su diskurso, Minister Boekhoudt, a enfatisá ku e dos momentunan aki no ta solamente un selebrashon, sino tambe un invershon den e futuro di nos sistema di kuido.
E minister a rekordá ku mas ku mil persona na Kòrsou ainda ta wardando pa atenshon médiko i ku e falta di personal kualifiká ta un di e motibunan prinsipal di e listanan di espera.
“Kada profeshonal ku graduá ta un paso mas den e direkshon korekto. Si nos ke mehorá aksesibilidat di kuido, nos mester sigui invertí den formashon, talento lokal i kapasidat. I nos mester kòrda semper ku nos mester rekonosé i balorá nos profeshonalnan den e sektor di kuido. Falta hopi mas pa drecha, e kaminda ta largu i turbulento, pero nos no ta para ketu, nos ta sigui lucha pa e sektor aki i su hendenan.”
Minister Boekhopudt a konfirmá ku e koperashon ku IFE i Curaçao Medical Center lo kontinuá. Un di e prioridatnan ta soru pa e 27 kandidatonan ku ainda ta wardando pa kuminsá nan estudio komo operatieassistent por kuminsá mas lihé ku ta posibel, pa asina sigui amplia e kapasidat di kuido na Kòrsou.