Publiká riba 14 Yüli 2026
Willemstad, 13 di yüli 2026 – Fundashon Sonrisa, Klinika Capriles i Fundashon pa Maneho di Adikshon (FMA) a entregá nan kuenta anual di aña 2025 na Minister di GMN, Tyron Boekhoudt.
Tur e kuentanan anual entregá ta ku aprobashon di un accountant, loke ta mustra ku nan atministrashon ta na òrdu i ku nan ta kumpli ku e rekisitonan finansiero i atministrativo.
Minister Boekhoudt a ekspresá su apresio pa e esfuersonan di e tres fundashonnan. Nan ta duna un bon ehèmpel di transparensia, responsabilidat i bon gobernashon den sektor di kuido.
E minister a enfatisá ku ta importante pa tambe pone atenshon riba e desaroyonan positivo den sektor di kuido. Apesardi e echo ku tin desafionan ku mester haña atenshon, Fundashon Sonrisa, Klinika Capriles i Fundashon pa Maneho di Adikshon (FMA) ta demostrando ku tin organisashonnan kaminda e proseso atministrativo ta kana bon i kaminda bon maneho ta un prioridat.