Publiká riba 19 Yüli 2026
Tin 45 dia mas te 31 di ougùstùs 2026 pa hasi esaki
Willemstad – Minister di Hustisia, Shalten Hato, ta hasi un yamada na tur hóben di 17 aña òf mas ku ta interesá den un karera den sektor di hustisia. Tin 45 dia pa entrega bo solisitut pa bira Polis, Bombero òf Agente di Seguridat. E periodo di inskripshon ta sera ofisialmente riba 31 di ougùstùs 2026.
Durante e aktividat di Punda Vibes, hopi hóben a pasa na e stènt di Kuerpo Polisial Kòrsou, Brantwer Kòrsou i tambe Sentro di Detenshon i Korekshon Kòrsou i a pa haña informashon tokante e diferente profeshonnan. Tambe a nota ku vários hóben a mustra interes, pero no a bin prepará ku nan CV digital ni karta di motivashon pa por kompletá nan solisitut.
Minister Hato ke enkurashá tur hóben ku ta soñá di sirbi komunidat pa no laga e oportunidat pasa bai. E aplikashon por ser hasi fásilmente via www.traboudenhustisia.com, kaminda e dokumentonan nesesario ta un CV aktualisá, un kopia di ID i un karta di motivashon.
Durante Punda Vibes, e hóbennan tambe a haña e oportunidat pa pone nan kondishon físiko na prueba dor di partisipá den e FMO-test na KPC i e Fit Tèst na Brantwer Kòrsou. E aktividat aki a keda evaluá komo un gran éksito i a duna hopi hóben un mihó idea di e eksigensianan físiko ku e funshonnan aki ta pidi.
Despues ku e periodo di solisitut sera riba 31 di ougùstùs 2026, kada organisashon hudisial lo evaluá tur e solisitutnan risibí pa determiná si e kandidatonan ta kumpli ku e kriterionan stipulá. Esnan ku ta kumpli lo risibí un invitashon pa partisipá den e tèstnan físiko i posteriormente den e “Match Dagen” di Ministerio di Hustisia.
Ministerio di Hustisia ta enkurashá tur interesá pa no warda te e último momentu. Probechá e temporada di fakansi pa prepará bo dokumentonan i entrega bo solisitut na www.traboudenhustisia.com. Bo futuro por kuminsá awe.
