Notisia

WILLEMSTAD — Resientemente, e inougurashon di e promé sinku streanan di Paseo Artístiko Nashonal a tuma lugá. Meta di e paseo akí ta pa demostrá apresio i duna mas publisidat na Kòrsou su artistanan, ku a sobresalí den diferente género artístiko.

E promé sinku streanan di Paseo Artístiko Nashonal a keda instalá durante e seremonia di apertura ku a tuma lugá dia 30 di yüni na Fuik dilanti di Rif Fort na Otrobanda, den presensia di diferente minister, miembro di Parlamento i pueblo di Kòrsou. Durante e promé edishon di e Paseo Artístiko, sinku artista a keda honrá pa nan prestashon i kontribushon na Kòrsou den e áreanan di músika, arte visual, literatura i arte di eséniko.

Ministerio di Enseñansa, Siensia, Kultura i Deporte (ESKD) a disidí pa kita e plakatnan temporalmente pa hasi algun ahuste pa prevení daño i degradashon kousá pa e olanan fuerte den e área. E trabounan lo dura aproksimadamente un siman pa garantisá protekshon nesesario pa e streanan.

Ministerio di ESKD ta spera di reinstalá e streanan den un siman. E trabou akí ta importante pa protehá e proyekto i garantisá ku e Paseo Artístiko por sigui honrá e talento i kontribushon di artista nan pa hopi aña mas.

—
KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte