Publiká riba 17 Sèptèmber 2026
WILLEMSTAD – Bou di guia di Minister di Desaroyo Ekonómiko, dr. Roderick Middelhof, Ministerio di Desaroyo Ekonómiko (MEO) ta sigui traha pa duna empresarionan un servisio efektivo, aksesibel i prepará pa futuro. Den e promé mitar di 2026, MEO a prosesá 96,7% di di tur petishon pa pèrmit ekonómiko ku a drenta.
Minister Middelhof ta mira e desaroyo aki komo un base importante pa kresementu ekonómiko di Kòrsou. E kresementu di turismo, mas atenshon internashonal pa Kòrsou debí na, entre otro, Blue Wave i Kampionato Mundial, i e deseo di mas hende pa hasi negoshi ta krea oportunidatnan nobo. Segun e minister, servisio di Gobièrnu mester krese mesun pareu ku e desaroyonan aki.
P’esei, MEO ta sigui evaluá i ahustá su prosesonan, maneho i lei kaminda ta nesesario. E meta ta e sistema di pèrmit ekonómiko sigui funshoná di un manera organisá i efektivo. Tambe e mester sigui kuadra ku e nesesidatnan di nos ekonomia i di nos empresarionan.
Den e promé mitar di 2026, MEO a risibí un total di 1.828 petishon pa pèrmit ekonómiko. Pa kompará: durante henter 2025, MEO a risibí 2.820 petishon. Esaki ta nifiká ku den solamente seis luna, MEO a risibí 64,8% di e kantidat total di petishon di 2025.
Di e 1.828 petishonnan risibí, MEO a prosesá 1.768. Ainda tin 60 petishon den proseso. Esaki ta nifiká ku MEO a prosesá 96,7% di e petishonnan risibí, miéntras ku 3,3% ainda ta den proseso.
“Empresarionan mester por konfia ku Gobièrnu ta trata nan petishonnan ku kuidou i sin tardansa innesesario. E resultadonan aki ta mustra ku nos koleganan ta hasi esfuerso tur dia pa prosesá e petishonnan di un manera efektivo i efisiente. Na mes momento, nos ta sigui buska manera pa hasi e proseduranan mas simpel i mas lihé,” segun minister Middelhof.
E siguiente tabèl ta duna un bista general di e petishonnan ku MEO a risibí i prosesá den e promé mitar di 2026:
| Kategoria di pèrmit | Risibí | Prosesá | Den proseso |
| Pèrmit di establesementu (Vestigingsvergunning) | 1.445 | 1.422 | 23 |
| Pèrmit pa establesé un filial (Filiaal vestigingsvergunning) | 18 | 18 | – |
| Pèrmit pa un lugá di benta temporal òf permanente (Standplaats – tijdelijk/permanent) | 228 | 213 | 15 |
| Pèrmit pa benta ambulante temporal òf permanente (Ventvergunning – tijdelijk/permanent) | 59 | 54 | 5 |
| E-Zone | – | – | – |
| Pèrmit pa Horeca | 72 | 60 | 12 |
| Retiro di pèrmit (Intrekkingen) | 6 | 1 | 5 |
| Total | 1.828 | 1.768 | 60 |
Minister Middelhof ta enfatisá ku mehorashon di servisio di MEO na siudadano i empresarionan ta keda un prioridat importante. P’esei, MEO lo sigui evaluá e leinan eksistente, e maneho i e prosesonan interno. Ministerio lo wak, entre otro, kon por hasi e proseduranan mas simpel, informá petishonarionan mihó, i kaminda ta posibel, prosesá petishonnan mas lihé.
“Desaroyo ekonómiko no ta pidi solamente empresarionan dinámiko i ku ta mustra inisiativa. E ta pidi tambe un Gobièrnu aksesibel, ku ta pensa huntu ku nan i ku ta yuda krea oportunidatnan. Komo ministerio, nos lo sigui traha ku enfoke riba esaki,” di akuerdo ku Minister Middelhof.
