Publiká riba 25 Sèptèmber 2026
WILLEMSTAD – Djabièrnè, 25 di sèptèmber 2026, na okashon di SDG Flag Day, Kòrsou ta hisa e bandera di e Metanan di Desaroyo Sostenibel (SDG) di Nashonnan Uní. E dia aki ta un momento pa reflehá riba e futuro ku nos ke konstruí pa nos isla, pero tambe riba e retonan ku nos komunidat ta enfrentá awe.
Promé Minister Pisas ta enfatisá ku “E bandera ta representá un kompromiso. Pero un kompromiso tin balor ora hende por sinti su resultado den nan bida diario. Nos sa ku tin preokupashon den nos komunidat, entre otro tokante seguridat na skol i e situashon di nos penshonadonan. E preokupashonnan aki ta pidi atenshon serio i akshon konkreto di nos banda.”
Kòrsou ta enfoká riba seis SDG prioritario:
1 SDG 1 – Eliminá pobresa: Fortalesé seguridat sosial i oportunidatnan pa tur hende.
2 SDG 3 – Bon salú i bienestar: Promové kuido preventivo, un bida salú i kuido di salú aksesibel.
3 SDG 4 – Enseñansa di kalidat: Invertí den enseñansa i den un ambiente di skol kaminda muchanan por sinti nan mes sigur.
4 SDG 7 – Energia pagabel i limpi: Sigui traha na fuentenan di energia sostenibel i pagabel.
5 SDG 8 – Trabou digno i kresementu ekonómiko: Krea mas oportunidat pa un ekonomia inklusivo.
6 SDG 14 – Bida bou di awa: Protehá nos laman, refnan di koral i ekosistemanan marino.
“Nos no por mira e metanan aki komo algu ku nos a alkansá kaba. Nan ta indiká unda nos mester sigui pone nos esfuerso. Desaroyo sostenibel ta pidi trabou kontinuo, desishonnan konkreto i kolaborashon entre Gobiernu, sektor empresarial, enseñansa, organisashonnan sosial i siudadanonan. E bandera ku nos ta hisa awe mester rekordá nos di e responsabilidat ei,” Promé Minister Pisas a konkluí.