Kòrsou, 8 di oktober 2026 – Bou di e bandera di Actiecentrum Ondermijning Curacao (ACOC), Kuerpo Polisial Kòrsou (KPC) i diferente instansha, a realisá algun kòntròlnan multidisiplinario na diferente garashi na Kòrsou.
Durante e kòntròlnan aki tabatin varios instanshanan presente, inkluyendo Kuerpo Polisial, Ministerio Públiko (OM), Inspekshon di Belastingdienst (SBAB), Inspekshon GMN, Aqualectra, Inspekshon di MEO, Projectteam Toezicht en Handhaving (VVRP) i Inspekshon di SOAW.
A tuma nota di vários violashon di lei serka e establesimentunan, entre otro dor di no ta registrá na Kámara di Komersio, no tin un ‘vestigingsvergunning’, hòrtamentu di awa i koriente, garashinan ku no ta den poseshon di un Hindervergunning, trahadónan ku no ta registrá i establesimentunan sin number di crib.
E tim a duna varios atvertensha. Un kompania a wòrdu será pasobra e no tabata registrá na Kámara di Komersio i tampoko tabata dispone di un ‘vestigingsvergunning’. Si robo di awa i/òf elektrisidat a wòrdu konstatá, Aqualectra ta sera esaki imediato. Tambe e tim a duna informashon tokante ley i reglanan vigente, i kiko mester regla si bo kier habri un garashi na Kòrsou.
E resultadonan aki ta enfatisá e nesesidat di kòntròl kontinuo i koperashon entre diferente instanshanan. ACOC i Kuerpo Polisia Kòrsou ta pone énfasis riba e importansha di e kòntrolnan integral aki i lo sigui realisá esakinan den futuro.
ACOC ta un organisashon ku ta kai bou di Ministerio di Hustisia i ta komprometé su mes na un aserkamentu integral i atministrativo pa kombati krímen ku ta debilitá nos komunidat, den kua koperashon entre partnernan paden i pafó di gobièrnu ta sentral.