Publiká riba 15 Òktober 2026
Willemstad – Riba djaweps, 15 di òktober 2026, Konseho di Minister di Kòrsou, presidí pa Promé Minister Gilmar Pisas, a hiba kombersashon ku Sekretario di Estado pa Asuntunan Interno i Relashonnan den Reino, Sr. Eric van der Burg. Den un ambiente habrí i konstruktivo a hiba kombersashonnan pa loke ta trata diferente tema den e relashon entre Kòrsou i Hulanda, i e otro islanan Karibense den Reino.
Un di e tópikonan tabata e vensementu di e Areglo di Koperashon Mutuo (Onderlinge Regeling Samenwerking) riba reformanan na aprel 2027. A base di e areglo akí, Kòrsou ta kolaborá ku Hulanda den ehekushon di reformanan for di e Pakete di Pais. Aprobashon di Parlamento ta nesesario pa un ekstenshon di e areglo. Parlamento lo reuní ku Promé Minister riba e tema akí djaweps próksimo, 22 di òktober.
Mas aleu a kòmbersá tokante preparashon di e evaluashon di e Lei di Reino pa Supervishon Finansiero di Kòrsou i Sint Maarten ku ta tuma lugá otro aña, i e nombramentu di e miembro di Kòrsou den e Hunta di Supervishon Finansiero (Cft). Tambe a atendé preparashon pa e Kumbre di Reino ‘Kingdom Summit’, ku lo tuma lugá na Sint Maarten dianan 17 i 18 di novèmber 2026. Durante di e Kumbre di Reino, e kuater paisnan di Reino lo interkambiá informashon riba kuater tema. Esakinan ta inkluí seguridat di e paisnan, inkluso protekshon kontra atakenan sibernétiko, e efektonan di kambio di klima riba islanan chikitu, i desaroyo finansiero i ekonómiko di e paisnan. Adishonalmente Kòrsou ta introdusí kombatimentu di pobresa komo prioridat nashonal.
Tambe a palabrá ku Kòrsou lo organisá un Konferensia di Reino den e promé kuartal di 2027. Temanan ku mester trata einan ta entre otro e defisit demokrátiko den Reino, e mekanismo di resolushon di disputa inisiá pa e parlamentonan di e paisnan Karibense, i otro temanan relashoná ku e funshonamentu di Statüt pa Reino Hulandes. Banda di esaki e partidonan a interkambiá di opinion tokante posibel kolaborashon atministrativo den Reino pa konhuntamente atraé finansiamentu di Union Oropeo. Tambe a trata siguridat di kuminda i e proyekto na Sint Joris ku tin komo meta fortalesé e sektor di agrikultura na Kòrsou.
Promé Minister Pisas: “Nos a interkambiá di opinion riba un rango amplio di tópiko. Kòrsou ta keda komprometé na kolaborashon den Reino, pero a base di igualdat i ku rèspèt pa outonomia di otro.”