Publiká riba 19 Òktober 2026
Willemstad – djadumingu 18 di òktober 2026, Promé Minister Gilmar Pisas a tene un reunion ku Sheikh Joaan bin Hamad Al-Thani, presidente di Olympic Council of Asia (OCA) i Qatar Olympic Committee na Sandals Royal Curaçao.
Sheikh Joaan tabata na Kòrsou pa asistí na e di 24 Asamblea General di Caribbean Association of National Olympic Committees (CANOC), ku a ser habrí pa Promé Minister Pisas. Na e reunion tabata presente tambe Visepromé Minister Shalten Hato i señora Christine Dania, presidente di Federashon Deporte i Olímpiko Kòrsou (FDOK).
Durante e enkuentro, Promé Minister Pisas i Sheikh Joaan a interkambiá ideanan tokante posibilidatnan di kooperashon entre Kòrsou i Qatar den diferente sektor. Entre otro, nan a papia di deporte internashonal i organisashon di eventonan deportivo, konekshonnan aéreo den Karibe, turismo i industria di petroleo i gas.
Promé Minister Pisas ta konvensí ku Sheikh Joaan por hunga un papel importante den e desaroyonan aki, sea dor di su envolvímentu direkto òf dor di su kontaktonan internashonal ku por kontribuí na realisashon di diferente oportunidatnan pa Kòrsou.
Durante e reunion, a keda akordá ku e konsehero di Promé Minister Pisas i e konsehero di Sheikh Joaan lo mantené kontakto pa koordiná un bishita di Promé Minister Pisas na Qatar durante e promé mitar di aña 2027.
Promé Minister Gilmar Pisas a ekspresá su apresiashon pa e enkuentro:
“Tabata un honor pa mi por a konosé Sheikh Joaan personalmente. Mi tin e konvikshon ku, via di su retnan di kontakto tantu na Qatar komo pafó di Qatar, e por kontribuí signifikativamente na e desaroyo kontinuo di nos pais.”