Ami Ta Prepará Expo: un eksperensia interaktivo pa grandi i chikí - Informashon tokante Gobièrnu di Kòrsou

Notisia

Asuntunan General i Promé Minister
 

Ami Ta Prepará Expo: un eksperensia interaktivo pa grandi i chikí

Publiká riba 20 Òktober 2026

WILLEMSTAD – Djasabra, 17 di òktober 2026, ‘Ami ta Prepará Expo’ a tuma lugá na Brionplein. Durante oranan di atardi grandi i chikí a haña e oportunidat pa deskubrí, di un manera interaktivo i den un ambiente relahá, kon nos mes i nos famia por ta mihó prepará pa kualke situashon di krísis òf emergensia.

‘Ami ta Prepará Expo’, organisá pa e Direktorado di Kontròl di Riesgo i Maneho pa Kalamidat (DRR) huntu ku diferente partner, ta parti di e trayekto di konsientisashon ‘Ami ta Prepará’, ku meta pa duna habitantenan di Kòrsou informashon i konseho práktiko pa nan por tuma e pasonan nesesario pa ta mihó prepará. Durante ‘Ami Ta Prepará Expo’ bishitantenan por a haña mas informashon riba e trabou di e diferente servisio di emergensia, organisashon di reskate i servisio di Gobièrnu. Entre e organisashonnan presente tabatin e diferente identidat ku ta forma e organisashon pa manehá krísis i kombatí kalamidat (CRB0), nan liaison i diferente organisashon pafó di Gobièrnu ku ta traha riba tereno di kombatí krísis.

Bishitantenan a risibí tepnan práktiko ku nan por apliká na kas pa protehá nan mes i nan famia. E mensahe sentral tabata ku preparashon ta un responsabilidat kompartí. Mas mihó prepará kada siudadano ta, mas mihó prepará kada kas di famia ta. Esaki ta duna servisionan di emergensia mas espasio pa duna asistensia na esnan mas vulnerabel den nos komunidat.

E aña aki ‘Ami ta Prepará Expo’ a inkluí tambe e promé edishon di e ‘Ami ta Prepará Scavenger Hunt’. Gruponan por a registrá adelantá i for di oranan di mèrdia riba djasabra e diferente timnan a kore rònt den outo pa kompletá reto i tarea tokante riesgo i krísis. Na final e timnan a reuní riba Brionplein pa premiashon, Premio máksimo tabata Cg. 2.500,- kèsh pa e tim ganadó, kortesia di Banco di Caribe. 

Danki na tur ku a kontribuí i partisipá

Gobièrnu di Kòrsou ta gradisí miembro di e organisashon di krísis, liaison, partner, spònser kolaboradó i boluntario pa nan aporte. Un danki spesial tambe na un i tur ku a bishitá ‘Ami ta Prepará Expo’ i na tur e timnan ku a partisipá na ‘Ami ta Prepará Scavenger Hunt’. E reakshonnan positivo ta un estímulo pa sigui informá i prepará nos komunidat. Pa mas informashon, sigui ‘Ami ta Prepará’ riba Facebook i Instagram, e páginanan di Gobièrnu di Kòrsou i www.amitaprepara.cw

Un tiki preparashon, hopi trankilidat!