Konseho di Minister ta risibí Cft pa un konsulta regular - Informashon tokante Gobièrnu di Kòrsou

Notisia

Gobièrnu di Kòrsou
 

Konseho di Minister ta risibí Cft pa un konsulta regular

Publiká riba 28 Òktober 2026

WILLEMSTAD – Djárason, 28 di òktober 2026, Konseho di Minister a risibí bishita di Hunta di Supervishon Finansiero (Cft) pa un konsulta regular. Kada bishita di Cft ta trata un tópiko spesífiko kaminda ta pone atenshon na sifra i pronóstiko.  Tambe Cft ta kompartí algun rekomendashon a base di tur datonan disponibel. Durante di e enkuentro akí Presidente di Cft, Hans Hoogervorst, a duna un presentashon ku e tópiko prinsipal: ‘Turismo’

E liña kòrá durante e presentashon tabata desaroyo di turismo i posibel impakto i efektonan ku esaki por tin riba nos komunidat, desaroyo ekonómiko i finansa. Tur esaki tantu riba término korto i plaso largu. Por lo general desaroyo di turismo riba nos islanan por tin efekto riba entre otro nos infrastruktura, e sektor laboral, medio ambiente i tambe nos bida diario.

E kòmbersashon tabata unu ameno i positivo kaminda Cft a presentá diferente posibilidat, pa komo pais nos por generá mas i mihó entrada for di turismo. Tambe a konsehá pa spesífikamente traha riba un maneho struktural pa ‘AirBnb’ komo opshon di hospedahe i pa konsentrá mas riba kalidat en bes di riba riba kantidat komo destinashon turístiko.

Vise Promé Minister Shalten Hato a para ketu na e retonan ku envehesimentu di nos poblashon ta trese kuné sigur pa e sektor laboral. Na su turno Minister di Finansa, Charles Cooper, a splika ku for di 2010 Kòrsou a pone komo meta ku nos mester amplia nos poblashon, pa asina por yuda karga tur desaroyo aktual i den futuro.

Otro tema ku a bini dilanti ta seguridat sosial, amplia kresementu di otro pilarnan ekonómiko banda di turismo, esta diversifikashon i e desaroyo positivo di pais su kuota di debe ku for di 2021 ta den un bahada ku sigur ta hopi bon pa mantené esaki. 

Sr. Hoogervorst tabata akompañá pa sr. Paul Hilbers (Miembro nominá pa Hulanda), sra. Elizabeth de Cuba (Miembro nominá pa Kòrsou), sr. Perry Geerlings (Miembro nominá pa St. Maarten), i demas miembronan di e delegashon: sr. Han van Midden, sr. Jeroen Tellings, sra. Tiziana Penso i sra. Jasmijn Kossick.